OÉ-CUSSE, 09 marsu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, sábadu ne’e kolleta batar ektare 12 iha aldeia Bausiu, suku Nipani, sub-rejiaun Pante Makasar, hafoin hetan salvasaun hosi adubu orgániku ho naran Ako’y Magsasakang Organiku (AMO).
Notísia relevante: PA RAEOA lansa adubu orgánika hasa’e produsaun no hamate Lakataru
Tan ne’e, Rogério Lobato, hamutuk ho membru Autoridade sira, sábadu ne’e observa direita kona-bá rezultadu implementasaun hosi adubu orgániku ne’e, tanba antes ne’e hetan atakasaun maka’as hosi peste Lakataru.
“Ami mai haree nia rezultadu, sira rega adubu orgániku ne’e iha to’os batar nian, no peste sira-ne’e mate hotu, batar bele buras no isin di’ak, tán ne’e rezultadu ida di’ak, ida-ne’e loke dalan ona atu hola adubu ne’e barak liután nune’e bele kombate peste ne’ebé ataka batar, hare no ai-haan seluk-tán,” PA RAEOA ko’alia iha Nipani.
Eis Ministru Interiór ne’e sei orienta Sekretaria Rejionál Agrikultura, halo levantamentu dadus agrikultór sira iha sub-rejiaun haat, nune’e bele propoin iha planu orsamentu retifikativu 2024, hodi kontinua implementa ba komunidade sira sira iha territóriu Oé-Cusse.
“Iha Oé-Cusse moris hosi agrikultura, entaun Governu tenke fó atensaun boot ba ida-ne’e, ita bele propoin ba Konsellu Ministru, atubele iha orsamentu retifikativu bele kontempla mós, nesesidade sira hanesan ne’e, ita labele apoi de’it iha-ne’e, tanba Oé-Cusse rai boot, ne’e duni agrikultura batar no hare, iha sub-distritu haat, Pássabe, Nítibe Oésilo agora ita iha Pante Makasar, bele hetan hotu,” nia promete.
“Tan sub-distritu idak-idak ho nia nesesidade rasik, ne’ebé Sekretária Rejionál Agrikultura sei halo levantamentu ida ba nesesidade sub-distritu idak-idak nian, bazea ba ida-ne’e, ita ita halo programa asaun ida, nune’e bele aloka osan hodi sosa adubu orgániku AMO ne’e,” nia katak.
Luís Meco, nu’udar to’os na’in, agradese tanba antes ne’e batar iha to’os laran, hetan atakasaun hosi peste Lakataru afeta nia tahan namlaek, maibé hafoin rega ho adubu orgániku AMO, konsege salva, batar, hare, no produtu seluk tán.
“Depois ha’u tau adubu AMO, ha’u utiliza sei di’ak ba ha’u-nia batar no hare rezultadu di’ak tebes, ha’u prefere ba oin ita tenke uza nafatin adubu ne’e, tanba la estraga buat ida, maibé antes seidauk uza adubu AMO, ha’u hetan atakasaun barak, derrepente peste Lakataru ne’e ataka no haan hotu batar no hare nia tahan, maibé depois ha’u rega tiha, komesa di’ak fali, agora kontinua moris, no matak hela de’it, durante semana rua udan la mai mós matak nafatin, la namlaek ida, tanba ne’e ha’u rega dala rua ona,” nia orgullu.
Agrikultór ne’e rekomenda ba Autoridade kontinua implementa tán ba iha suku seluk tán konsentra de’it iha Pante Makasar, tanba utilizaun adubu AMO, salva ai-haan hosi hosi peste Lakataru no aumenta produsaun.
Antes ne’e Autoridade RAEOA lansa mós ba natar sira hamutuk ektare rua iha suku Lalisuk, sub-rejiaun Pante Makasar.
Notísia relevante: MAP kapasita estensionista RAEOA maneira salva ai-han hosi peste lakataru
Jornalista: Abílio Elo Nini
Editór: Evaristo Soares Martins
