iklan

COVALIMA, HEADLINE

Terra no Propriedade Covalima laiha transporte atu apoia serbisu

Terra no Propriedade Covalima laiha transporte atu apoia serbisu

Diretór Terra no Propriedade Servisu Kadastrál Covalima, Carlos Caetano. Imajen/Celestina Teles.

COVALIMA, 11 marsu 2024 (TATOLI) –  Diresaun Terra no Propriedade Servisu Kadastrál (DTPSC) munisípiu Covalima falta transporte atu fasilita funsionáriu sira hala’o servisu, tanba ne’e sira uza de’it motizada privada.

“Ami hasoru difikuldade laiha transporte hanesan motorizada no karreta operasionál. Ami iha de’it motorizada rua ne’ebé dadaun ne’e ida aat ona no ida mak sei di’ak hodi bele uza, tanba ne’e ami labele serbisu to’o iha postu administrativu sira”, diretór DTPSC, Carlos Caetano, hatete iha bairru Rompe, ohin.

Nia dehan, funsionáriu sira iha Terra no Propriedade hala’o serbisu tuir kondisaun ne’ebé mak iha no enxe rasik kombustivel hodi halo atendimentu bainhira komunidade hato’o keixa ba diresaun.

Kona-ba problema falta transporte ne’e diresaun sempre hato’o ba iha parte nasionál, maibé laiha rezultadu, tanba ne’e Carlos Caetano salienta katak atu hala’o serbisu ne’ebé di’ak presiza mak transporte, orsamentu no ekipamentu sira tanba buat tolu ne’e mak la rezolve funsionáriu sira labele halo serbisu ho di’ak.

Dadaun ne’e, funsionáriu ne’ebé serbisu ativa iha Terra no Propriedade Covalima hamutuk na’in-ualu, kompostu husi permanente tolu no kontratadu lima.

Dirijente ne’e mós relata katak, entre janeiru no marsu, Terras no Propriedade prosesa ona kliente ne’ebé foti kontratu foun na’in-haat, halo renovasaun ba kontratu na’in-haat ne’ebé seidauk hetan despaixu husi nasionál no 18 sei halo prosesu atu utiliza rezidénsia ba atividade komersiál.

Mekanizmu atu selu arrendamentu bazeia ba medida rai no lokalizaun ne’ebé arrendatáriu sira uza hodi halo kontratu ho Terra no Propriedade.

Tuir dadus, iha tinan 2023, Terras no Propriedade rejista arrendatáriu iha Covalima hamutuk 439 hodi utiliza edifísiu públiku ne’ebé rekolla reseita hamutuk $57.162,50 ba kofre Estadu.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!