DILI, 11 marsu 2024 (TATOLI)- Japaun sei harii sentru estudu ida iha Timor-Leste hodi kapasita jovén timor-oan sira.
Planu ne’e hato’o hosi profesór Mitsuru Yamada hosi Universidade Waseda-Japaun, hafoin hasoru malu ho Primeiru-Ministru, Kay Rala Xanana Gusmão, iha Palásiu Governu, segunda ne’e.
“Ho Primeiru-Ministru ko’alia kona-ba Sentru Estudu Japaun hodi apoiu ba tékniku kreativu sira”, profesór Mitsuru Yamada relata hafoin hasoru PM Xanana.
Durante hasoru malu profesór Mitsuru ho Xefe Governu ko’alia mós kona-ba interkámbiu entre Timor-Leste ho Japaun.
“Ne’ebé ami-rua diskusaun kona ba oinsá apoiu foinsa’e sira, hodi bele kontribui ba dame. Tanba bainhira ita hare’e ba situasaun iha mundu agora nakonu ho konflitu. Ita iha ne’e hodi dudu atu iha interkámbiu entre kultura, dame no dezenvolvimentu”, nia akresenta.
Nia afirma katak, universidade durante ne’e liuhosi Japan International Corporation Agency (JICA) fasilita bolsu estudu, no agora iha ema na’in-neen husi Timor-Leste mak halao hela estudu, balun mai hosi dosente Universidade Nasionál Timor Loro-sa’e ne’ebé ba hasai sira-nia kursu iha Doutoramentu.
Primeiru-Ministru apresia no apoia programa Japaun nian ba estabelesementu sentru estudu ne’e tanba sei fó vantazen boot ba Timór.
Sorin seluk, Embaixadór Timor-Leste iha Japaun, Ilídio Ximenes, reforsa katak, sentru estudu ne’e sei estabelese iha UNTL.
“Loos duni katak sei estabelese sentru estudu iha UNTL. Ne’ebé dadaun ne’e dosente ida hosi UNTL, Dulce Martins mai eskola iha Japaun hodi hasai kursu Doutoramentu, iha universidade Waheda ligadu ho estabelesementu sentru refere”, Elídio adianta.
Jornalista : Antónia Gusmão
Editór: Rafael Ximenes de A. Belo
