MAPPF-AFoCO halo konsultasaun ho autoridade Viqueque ba implementasaun programa GCF
VIQUEQUE, 11 marsu 2024 (TATOLI)-Ekipa Ministériu Agrikultura, Pekuária, Peska no Floresta (MAPPF) hamutuk ho parseiru Asian Forest Cooperations Organization (AFoCO), segunda ne’e, halo konsultasaun ho autoridade munisípiu Viqueque kona-bá implementasaun programa Green Climate Change (GCF) iha munisípiu Viqueque.
“Ita nia objetivu konsultasaun ne’e atu ekipa MAPPF no AFoCO hosi nasaun Filipina hodi bele rona autoridade sira nia-hanoin kona-bá programa ne’e hodi ajusta ba programa prioridade GCF no halo levantamentu data hodi submete ba fundu GCF kona-bá Reziliénte Klimátika ba Restaurasaun Floresta no Kafé iha Timor Leste,” hatete Reprezentante Diretór Jerál Floresta, Celestina Barreto, bainhira halo abertura ba konsultasaun programa GCF iha munisípiu Viqueque.
Programa ne’e sei implementa durante tinan 5 iha munisípiu lima hanesan Viqueque, Manufahi, Ainaro, Aileu no Ermera.
Programa GCF ne’e sei fó príoridade ba área risku dezastre naturál hodi halo reflorestasaun no ba planta kafé. Tanba ne’e, maka ekipa mai halo uluk konsultasaun molok implementa programa sira-ne’e.
Bainhira konsultasaun ne’e hotu, nia dehan ekipa husi AFoCO hato’o proposta ba Nasaun Unida atu apoia fundu hodi implementa programa GCF ho durasaun tinan iha munisípiu Viqueque.
Iha fatin hanesan, Prezidente Autoridade Munisípiu Viqueque, Januário Soares ‘Bolly’, agradese ba organizasaun AFoCO ne’ebé servisu hamutuk ho MAPPF hodi halo reflorestasaun iha munisípiu Viqueque.
“Programa ida-ne’e, ami sei koordena ho MAPPF Viqueque atu halo reflorestasaun ba suku sira-ne’ebé maka seidauk halo reflorestasaun. Ba konsultasaun ne’e ita tau prioridade kuda ai-oan iha bee matan sira iha Viqueque hodi konserva bee, atu bailoron karik bee labele maran, kuda ai-oan ba mota atu rai labele hetan erosaun”, nia agradese.
Serémoni konsultasaun ne’e hetan partisipa husi Diretór MAPPF Viqueque, funsionáriu MAPPF, organizasaun naun Govermentál lokál, Fundasaun Knua Haberan Komunidade (KHC) Viqueque, Caritas inklui Diretór liña Ministeriál iha Viqueque.
Notísia relevante:OJE 2022: MAP prevee millaun $3,2 ba reflorestasaun-reabilitasaun kafé
Jornalista: Vitorino Lopes da Costa
Editór : Florencio Miranda Ximenes
