iklan

EKONOMIA, HEADLINE

PAM Lautém hasoru MPIE ko’alia prosesu konstrusaun Estrada ligasaun Lautém-Lospalos

PAM Lautém hasoru MPIE ko’alia prosesu konstrusaun Estrada ligasaun Lautém-Lospalos

PAM Lautém hasoru malu ho MPIE. Imajen/PAM Lautém

DILI, 11 marsu 2024 (TATOLI)—Prezidente Autoridade Munisípiu (PAM) Lautém, Mélio Mélio de Jesus, informa katak estrada nasionál ligasaun hosi Lautém to’o Lospalos vila sei halo konstrusaun iha tempu badak.

“Ohin ha’u halo vizita ofisiál ida ho Ministru Planeamentu Investimentu Estratéjiku (MPIE), Gastão de Sousa, atu ko’alia kona-ba infraestrutura báziku iha Lautém, oinsá atu aselera prosesu konstrusaun estrada nasionál liga hosi Munisípiu Lautém to’o Lospalos nian,” Mélio de Jesus, informa ba Agência Tatoli, iha arredór MPIE, Hudi-Laran, Dili, segunda ne’e.

Autoridade munisipál ne’e hateten, daudaun ne’e nia parte tau uluk prioridade ba estrada nasionál hosi Lautém ba Lospalos Vila tanba hafoin nia simu pose sai MAP Lautém povu munisípiu Lautém husu hakarak estrada refere tenke hadi’a lalais hodi fasilita movimentasaun komunidade nian.

“Liga ba infraestrutura báziku estrada iha Lautém barak mak kondisaun ladi’ak maibé daudaun ita foku uluk lai estrada nasionál mak foin haree fali ba estrada ligasaun ba postu administrativu sira hanesan, Trisula Tutuala, Lospalos ba Iliomar no Lospalos ba Lore,” Mélio hateten.

Nia hatutan, iha enkontru ne’e nia parte orgullu no apresia ho MPIE nia resposta tanba MPIE rasik husu nia haruka karta ida mai MPIE, nune’e sai hanesan baze ida hodi bele hato’o iha reuniaun Konsellu Admnistrasaun Fundu Infraestrutura (KAFI) nian. No hanesan informasaun de’it orsida loraik ministru rasik sei aprezenta iha reuniaun KAFI nune’e prosesu konkursu públiku nian bele la’o lais.

Estrada nasionál ligasaun hosi Lautém to’o Lospalos rasik ho ninia kilómetru 49.

“Kona-ba orsamentu ba konstrusaun estrada ne’e rasik ita seidauk hatene, tanba ne’e tanba desizaun hotu sei fó sai hosi reuniaun KAFI,” nia hateten.

Orsamentu Jerál Estadu (OJE) 2024, Governu aloka ba Munisípiu Lautém hamutuk $7.628.912. hosi orsamentu ne’e ba programa hamutuk 13 mak hanesan, programa estrada no ponte hamutuk 261.105, programa dezenvolvimentu rurál no urbanu hamutuk $1.929.079, programa seguransa nasionál $29.636, programa asesu ba justisa $34.223, programa funsionamentu instituisionál $2.163.115.

Nune’e ba programa edukasaun pre-eskolár hamutuk $269.582, programa ensinu báziku $1.716.839, programa ensinu rekorrente hamutuk $2.448, programa kuidadu saúde primária $203.569, programa água saneamentu $209.370, programa inkluzaun sosiál $161.913, programa turizmu $41.149, programa aumentu sustentável produtividade no produsaun $595.884.

Jornalista : Arminda Fonseca

Editór : Rafael Ximenes de A. Belo

iklan
iklan

Leave a Reply

iklan
error: Content is protected !!