OÉ-CUSSE, 11 marsu 2024 (TATOLI) – Prezidente Repúblika (PR), José Manuel Ramos Horta, sei apoia oferese apoia nesesidade bázika ba feto vulnerável na’in-50 iha Rejiaun Administrativa Espesiál Oé-Cusse Ambeno (RAEOA).
Tanba ne’e, iha segunda ne’e, Xefe Casa Sivíl hosi Prezidénsia Repúblika, Jesuína Maria Ferreira Gomes, realiza enkontru kortejia ho Prezidente Autoridade RAEOA, Rogério Tiago Lobato, atu atuliza informasaun hosi Prezidente Repúblika, kona-bá apoia sosiál, empoderamentu feto vulnerável sira, durante apoia ona iha Oé-Cusse.
“Ekipa Prezidénsia sei iha-ne’e to’o loron 15 marsu, aban ami sei ba iha suku lima, atu fó apoia nesesidade bázika ba iha komunidade sira iha suku lima, no ekipa sei kontinua fó apoia nafatin ba komunidade sira-ne’e, entaun presiza kooperasaun ho Autoridade RAEOA,” Xefe Casa Sivíl hosi Prezidénsia Repúblika, Jesuína Maria Ferreira Gomes, hateten ba jornalista sira.
Nia hateten, antes tún ba iha suku alvu sira, presiza atualiza ba iha Prezidente Autoridade RAEOA kona-bá serbisu área sosiál nian, ne’ebé durante ne’e Prezidente Repúblika apoia iha iha Oé-Cusse.
“Ohin, ami hasoru Prezidente Autoridade, koa’lia kona-bá serbisu área sosiál, ema ho nesesidade espesiál no mós empoderamentu feto, tanba Prezidente Repúblika fó tulun ona ba komunidade sira iha Oé-Cusse lubun ona, liuliu komunidade sira-ne’ebé vulneravel tanba menus ai-haan, uma ladi’ak no menús ropa,” nia afirma.
Nia informa, ekipa Casa Sivíl enkontru kortejia ho autoridade RAEOA, importante atubele atualiza atividade Prezidente Repúblika nian, ba iha Prezidente Autoridade ho ekipa, tanba durante ne’e Prezidente Repúblika, oferese ona apoia iha Oé-Cusse, la’ós la konsidera servisu RAEOA nian.
Maibé presiza kompleta tán serbisu ne’ebé Autoridade RAEOA halo tanba, atividade ne’e nia intensaun liuliu ba komunidade sira-ne’ebé presiza tebes tulun hosi Estadu.
“Vizita kortejia ne’e, fahe informasaun atu haree mós kanál kooperasaun ba oin, kuandu Prezidente Repúblika fó apoia ruma mai iha-ne’e, ita sempre koopera nafatin, tanba iha proposta barak, ami presiza apoia hosi Autoridade RAEOA ba levantamentu dadus, halo verifikasaun nune’e bele ajuda ekipa Prezidénsia, atu halo avaliasaun ba iha proposta sira-ne’e,” nia husu.
Prezidente Autoridade RAEOA, Rogério Tiago Lobato, apresia, no apoia tomak iha iha futuru presiza koopera nune’e kompleta programa ne’ebé autoridade hala’o ona iha Oé-Cusse.
“Programa ne’e kapaas, mai kompleta programa ne’ebé ami hala’o ona iha Oé-Cusse, ba oin kuandu koordena didi’ak atividade sira-ne’e entre Prezidensiál Repúblika ho RAEOA ita sei halo buat barak ne’ebé di’ak atu serbí ema sira-ne’ebé moris ho kondisaun kbiit laek,” nia katak.
Entretantu, benefisiáriu na’in-50, ekipa Prezidente Repúblika identika iha suku lima kada suku na’in-10, iha sub-rejiaun Pante Makasar iha suku Naimeko, Bobokase, Taiboko, Nípani no iha sub-rejiaun Nítibe Iha bsuku Suni-Ufe.
Jornalista: Abílio Elo Nini
Editór: Evaristo Soares Martins
