DILI, 11 marsu 2024 (TATOLI)– Sekretaria Estadu Formasaun Profisionál no Empregu (SEFOPE), Diresaun Nasionál Empregu Estranjeiru (DNEE), hahú rejista kandidatu traballadór hodi ba servisu iha Koreia do Súl.
Diretór DNEE, João Correia Pereira, hateten, atividade ne’e kada tinan sempre akontese, katak joven sira ne’ebé tuir kursu lian Koreia nian iha ne’ebé de’it bele rejista molok tuir teste sira tuir-mai.
Kada tinan SEFOPE servisu hamutuk ho Dezenvolvimentu Rekursu Umanu ka HRD (Human Resource Development) Koreia nian ne’ebé na’in ba programa ne’e, hodi loke rejistrasaun anu letivu, ne’ebé tinan 2024 nian sira hahú rejistu iha loron 11 to’o 20 marsu 2024.
“Tanba kada tinan sempre mosu engarafamentu bainhira loke rejistrasaun entaun iha tinan 2024 SEFOPE halo meiu lubuk ida no konsege halo jestaun di’ak ne’ebé realidade rejistrasaun jerál iha Jináziu Dili (GMT) ema ladun barak, ne’e lasignifika katak, ema mak laiha maibé semana rua liubá molok loke rejistrasaun refere, SEFOPE hahú uluk ona rejistrasaun kada munisípiu”, Diretór João Correia Pereira, hateten ba jornalista sira, iha Jináziu Dili, segunda ne’e.
Rejistu ne’e la’ós realiza de’it iha GMT maibé SEFOPE mós partilla ona informasaun ba sentru formasaun lian Koreia sira ne’ebé eziste iha Dili no munisípiu, hodi sira halo rejistrasaun ba joven sira ne’ebé hatene lian Koreia depois akumula hamutuk dadus sira ne’e.
Ne’ebé, sentru formasaun sira ne’ebé foti ona formuláriu hamutuk rihun 14, no fahe mós formuláriu ba sentru Governu nian formuláriu hamutuk 1.440.
Responsável ne’e apela ba joven sira ne’ebé hatene lian Koreia bele hakat ba rejista iha Jináziu Dili tanba rejistrasaun ne’e naklole ba sé de’it.
“Rejistu ne’e kada ema selu $28 maibé ne’e la’ós selu ba Governu Timor-Leste maibé ba na’in ba programa HRD Koreia. Kritéria ne’e Koreia aplika ba nasaun membru 27 inklui Timor-Leste. Bainhira rejistu sira maka sei teste ne’ebé planeia ona iha fulan-maiu 2024, faze dahuluk ba fábrika no tuir mak peska no área agrikultura ne’ebé nu’udar área foun”, nia haktuir.
Sentru formasaun lian Koreia iha Timor-Leste hamutuk 40-resin, enkuandu ne’ebé investe hosi Governu sentru ida mak Korean Studies and Language Program (KSLP).
Kouta ne’ebé Governu Koreia do súl ba Timor-Leste liu rihun ida, maibe depende tanba teste lian Koreia ho naran EPS-TOPIK (Employment Permit System- Test of Profiency in Korean) ne’e ba ema ne’ebé pasa duni iha teste ne’e mak bele tama ba sistema. Hafoin ida ne’e mak sei iha tan teste skill ka abilidade ne’e sei organiza direta hosi HRD Koreia, SEFOPE organiza de’it joven sira ne’ebé naran tama iha sistema laran.
Jornalista : Antónia Gusmão
Editór: Rafael Ximenes de A. Belo
