iklan

DILI

Aplikante bolsa rekrutamentu ba profesór 13.021 admitidu atu tuir teste eskrita

Aplikante bolsa rekrutamentu ba profesór 13.021 admitidu atu tuir teste eskrita

Diretora Rekursu Umanu Ministériu Edukasaun, Anita Tavares. Imajen Tatoli/Tomé Amado

DILI, 12 marsu 2024 (TATOLI)–Diretora Nasionál Rekursu Umanu iha Menistériu Edukasaun (ME), Anita Tavares Ribeiro de Jesus, hateten aplikante 13.021 mak admitidu atu tuir teste eskrita iha Komisaun Funsaun Públika (KFP) hosi totál aplikante hamutuk rihun 14-resin.

Notísia Relevante: 15 marsu: Aplikante bolsa rekrutamentu ba profesór sei tuir teste eskrita

“Ita verifika fila-fali no aplikante 13.021 mak admitidu hodi tuir teste iha 15 marsu, iha edifísiu KFP nian no sira-ne’ebé mak la admitidu hamutuk 1.631,” Diretora ne’e hateten ba Agência Tatoli iha nia kna’ar fatin, Vila Verde, tersa ne’e.

Aplikante ne’ebé mak la admitidu ne’e tanba la prienxe rekezitu sira hanesan laiha diploma mínimu ba baixarelatu ka hatama fali diploma ensinu sekundáriu nian no seluk fali rejistu tiha liuhosi online maibé la hatama dokumentu, tanba presiza iha dokumentu mak foin bele apllika ba vaga refere.

“Bainhira ita taka sai lista aplikante iha territóriu no ita fó tempu loron 15 hodi aplikante sira halo rekursu, karik la satisfeitu ho rezultadu. Entaun hosi ne’e ema hatama rekursu para atu hadi’a fali ne’e hamutuk 100-resin. Ita prontu hadi’a tanba dokumentu barak, ema verifika ne’e bele tau sala. Ne’e-duni, bainhira sira halo rekursu mai mak ami haree loos. Ne’e, ha’u hanoin, sira iha direitu atu tuir teste tanba teste ne’e rasik ita sei hala’o iha loron 15 marsu ne’e,” nia klarifika.

Agora daudaun ekipa hamutuk KFP sei halo hela preparasaun ba teste ne’e, tanba avizu fó sai ona no kandidatu sira hatene ona oráriu, no hein de’it loron para halo teste. Teste ne’e rasik hala’o iha KFP durante loron 2 ne’ebé sei realzia iha sesta-kinta (15-16 marsu 2024)

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!