DILI, 12 marsu 2024 (TATOLI) – Governu Fransa liuhosi nia Embaixadór ne’ebé rezide iha Jakarta, Fabien Penone, kompremete sei haforsa kuadru kooperasaun militár ne’ebé foka ba apoia Falintil-Forsa Defeza Timor-Leste (F-FDTL) hodi fó seguransa konjunta iha tasi hoo objetivu halo prevensaun peska ilegál.
“Ohin ha’u simu audiénsia hosi Embaixadór Fransa mai Timor-Leste ne’ebé iha Jakarta, iha enkontru ne’e ami deskute kuadru kooperasaun militár nian ne’ebé liga ba kooperasaun militár liuliu forsa rai rua bele fó segurasa konjunta ba tasi timor, nune’e bele prevene atividade ilísitu hanesan peska illegal, tráfiku umanu no tráfiku droga, inklui proteje ambiente tasi nian”, Ministru Defeza Kontra Almirante Donaciano Gomes Pedro Klamar Fuik hateten ba jornalista sira hafoin enkontru ho embaixadór ne’ebé rezide iha Jakarta, Fabien Penone, iha Ministériu Defeza Fatuhada, tersa ne’e.
Governante ne’e dehan, ró militár hosi Fransa iha domingu (10/3) foin lalais ne’e hosi tasi zona pasífika mai vizita Timor-Leste no atraka ona iha Portu Dili no estadia iha Dili durante loron haat.
“Vizita ró militár hosi Fransa ne’e atu hametin ita-nia kooperasaun”, nia afirma.
Tanba Fransa nu’udar nasaun ne’ebé nia illa balun pertense iha área pasífika nian, tanba ne’e ho vizita ró militár Fransa nian atu fortifika seguransa iha rai sira iha rejiaun pasífika inklui rai sira iha rejiaun ASEAN ba futuru.
Klamar Fuik hateten, durante ró militár Fransa estadia iha Timor-Leste, forsa navál Fransa sei halo ezersísiu militár ho forsa Komponente Navál Timor-Leste inklui oinsá atu lori ró hodi halo seguransa iha tasi-laran.
“Ho nune’emak ha’u hanoin katak vizita ró militár Fransa ne’e importante tebes tanba forsa navál hosi nasaun rua ne’e bele apoia malu iha treinamentu militár nian”, nia informa.
Nia haktuir, iha tempu badak Fransa mós kompomete atu haruka asesór nain rua mai Timor-Leste hodi fó asesoria ba militár no Governu atu tau matan ba tasi no situasaun tasi ho di’ak liután.
Embaixadór Fransa ba Timor-Leste ne’ebé rezide iha Jakarta Fabien Penone, dehan Fransa komprometidu atu kontinua apoia Timor-Leste iha kooperasaun militár, tanba Fransa nia poia ba Timor-Leste laos foin maibé desde antes Timor-Leste nian independénsia. Fransa haruka nia kontijénsia ida iha misaun pás hodi garante seguransa iha Timor-Leste.
“Fransa iha relasaun kle’ur tiha ona desde uluk fó apoiu bo’ot ba Timor-Leste nian kauza, no vizita ida-ne’e ami loke dalan hodi apoiu Timor-Leste ba seguransa iha tasi liuliu ba prevensaun peska illegál”, nia dehan.
Diplomata ne’e afirma ho vizita ró militár Fransa mai Timor-Leste atu fortifika relasaun bilaterál rai rua nian iha futuru.
Nia mós promte katak sei fila mai halo vizita ida iha fulan outubru atu organiza atividade gastronómia oinsá atu promove produtu ai-han rai rua nian.
Nia agradese ba Ministru Defeza Kontra Almirante Pedro Klamar Fuik ne’ebé simu nia ho di’ak iha enkontru ne’e.
Jornalista: Natalino Costa
Editór : Zezito Silva
