DILI, 12 marsu 2024 (TATOLI) – Ministru Defeza Kontra Almirante, Donaciano Gomes Pedro Klamar Fuik, hateten Ministériu Defeza konklui ona dekretu lei estatutu militár no tempu badak sei aprezenta iha Konsellu Ministru hodi halo aprovasaun.
“Agora daudaun ne’e, ita prepara ona dekretu lei estatutu militár, dekretu lei ida-ne’e atu fó valorizasaun ba veteranu sira ne’ebé sei ativu iha forsa armada, karik bainhira sira atu pasa ba reforma, lei ida-ne’e mak sei valoriza no dignifika sira signifika lei ida-ne’e ita nu’udar aktu dignifikasaun ba veteranu sira ne’ebé agora daudaun ativu hela iha forsa armada”, Klamar Fuik dehan ba jornalista sira hafoin enkontru ho embaixadór ne’ebé rezide iha Jakarta Fabien Penone, iha ofísiu ministeriál, Fatuhada, tersa ne’e.
Nia dehan, Ministériu Defeza, iha tempu badak, sei aprezenta dekretu-lei estatutu militár ne’e iha Konsellu Ministru.
“Agora ami seidauk aprezenta iha Konsellu Ministru, maibé tempu badak sei aprezenta iha Konsellu Ministru para deskute no halo aprovasaun, nune’e fó valorizasaun ba veteranu sira ne’ebé sei ativu iha forsa armada”, Governate ne’e konklui.
Jornalista: Natalino Costa
Editór : Zezito Silva
