DILI, 12 marsu 2024 (TATOLI)–Koordenadór Eskola Báziku Filial (EBF) Aimutin, Rogério Soares, hateten sala-de-aula ida mak akumula estudante 60 ba leten ne’e, sai difikuldade ba susesu hasoru ezame primeiru períodu nian iha tinan ne’e.
“Tanba iha EBF ida-ne’e kada sala-de-aula akumula estudante 60 ba leten, entaun susesu hasoru ezame períodu dahuluk nian, iha difikuldade bainihira ita liga ba kualidade. Ho manorin ne’ebé menus, mak sei la garante kualidade edukasaun iha eskola ne’e,” nia hateten ba Agência Tatoli iha nia kna’ar fatin, Aimutin, tersa ne’e.
Totál estudante iha EBF ida-ne’e hamutuk 1.044 inklui ho estudante foun 166, entaun estudante hirak ne’e labele akumula ba sala-de-aula 10 ho profesór na’in-22 (mane lima (5) no feto 17) inlui ho profesór ida hosi relijiaun nian.
“Ita iha ne’e presiza profesór na’in-rua tan hodi bele kompleta ba prosesu aprendizajen ba tinan ne’e. Nune’e, husu ba Ministériu Edukasaun katak ho vaga bolsa rekrutamentu (kandidatu) profesór ne’e bele despaixa mai ami-nia eskola ne’e,” nia dehan.
Aleinde ne’e, nia dehan, biblioteka mós laiha no daudaun ne’e uza de’it armáriu ida maibé labele tau livru hotu-hotu ne’ebé Ministériu Edukasaun distribui ba eskola refere.
Kona-na karteira eskolár ba IBF ne’e presiza tan tanba seidauk sufisiente no foin lalais ne’e halo pedidu karteira eskolár 200 maibé seidauk haruka mai.
Aleinde ne’e, Diretora Ensinu Báziku Sentrál (EBC) Faról, Filomena Fátima Freitas, hateten EBC ne’e sei presiza tan profesór na’in-16 hodi kompleta ba EBF haat sira seluk.
“Ami presiza profesór 16 hodi fahe ba eskola filiáll haat seluk ne’e. Tanba ne’e, ami hein no ami-nia esperansa katak bolsa rekrutamentu ba profesór ne’e fasilita, tanba ha’u-nia estudante hamutuk 2.256 ne’ebé kompostu hosi feto 1.109 no mane 986. Sala-de-aula hamutuk 21 maibé dupla sala tanba fahe turnu tolu (3). Ami preiza mós sala-de-aula tanba ami uza sala dupla,” nia dehan.
Maske ho profesór ne’ebé mak menus, nia dehan, daudaun ne’e dirasaun hanesan diretora, adjuntu no Xefe GAT mós tun hanorin estudante inklui estajiária ne’ebé mai estájiu iha ne’e, nune’e ezame nasionál períodu dahuluk ne’e sei la’o ho di’ak.
“Ezame primeiru períodu ne’e ha’u garante la’o di’ak,” nia garante.
Eskola Ensinu Báziku Filiál haat mak Ensinu Báziku Filiál Rumbia hamutuk 636, EBC Filiál Vila Verde 638, EBC Filiál Tuana Laran hamutuk 663 no EBC Filiál Fatuhada iha 1.242.
Entretantu, Koordenadór Eskola Bázika Filiál, Bairru Pite, Flaviano dos Santos, hateten iha difikuldade oioin ne’ebé eskola hasoru mak falta profesór no falta ekipamentu eskolár nian hanesan karteira eskolár.
“Ida-ne’e menus tebes. Entaun ezame periódika ami EBF Bairru Pite hanesan ha kurríkulu orienta ona katak ezame primeiru segundu siklu la inklui iha ne’eba, só iha de’it avaliasaun kontinuasaun. Tan ne’e, to’o iha loron 01 abríl, loron ezame nasionál períodu dahuluk ne’ebé estudante terseiru siklu no sekundáriu sira halo. Entaun, atividade iha eskola ne’e hanesan baibain, tanba avaliasaun ne’e la’o diariamente. Entaun, ita halo de’it avaliasaun kontinuasaun de’it, katak eskola la halo ezame maibé halo avaliasaun kontinua de’it,” nia dehan.
Nia dehan, atu ko’alia kona-ba kualidade labele akontese agora maibé presiza tempu tanba situasaun edukasaun mak la’o nune’e, tanba falta profesór no ekipamentu eskolár sei menus,” nia dehan.
Totál profesór na’in-18, feto 12 no mane neen (6), inklui koordenadór ho estudante hamutk 804, inklui ona ho estudante foun 135, ne’ebé sei utiliza sala-de-aula 10 no eskola ne’e fahe ba turnu rua (2).
Jornalista : Osória Marques
Editór : Cancio Ximenes
