iklan

NASIONÁL, DILI, HEADLINE

Xefe Estadu orienta MAE halo preparasaun ba komemorasaun 20 maiu

Xefe Estadu orienta MAE halo preparasaun ba komemorasaun 20 maiu

Ministru Administrasaun Estatál, Tomás do Rosário Cabral. Imajen Tatoli/Francisco Sony

DILI, 12 marsu 2024 (TATOLI) – Prezidente Repúblika (PR), José Ramos Horta, orienta Ministru Administrasaun Estatál (MAE), Tomas Cabral, atu halo preparativu ba komemorasaun loron restaurasaun independensia 20 de maiu ba dala-22.

“Prezidente Repúblika orienta ona ami atu forma ekipa ida atu halo preparasaun ba komemorasaun 20 de maiu tinan ida ne’e tanba ita sei konvida bainaka importante balun mai hosi li’ur,” MAE Tomas Cabral katak ba jornalista sira iha Palásiu Prezidensiál Dili, tersa ne’e.

Ministru ne’e dehan, orsamentu ba komemorasaun ne’e seidauk hatene montante, maibé MAE hahú forma ona ekipa hodi halo servisu liuliu oinsa atu hamos kapitál Dili tanba komemorasaun ba tinan ida ne’e sei realiza iha Palásiu Prezidensiál Bairro Pite Dili.

“Orsamentu ita seidauk hatene, ohin Prezidente orienta ami oinsa atu haree forma mós ekipa kontrola lixu sira iha kapitál Dili, haree área sira ne’ebé mak fó risku hodi hamosu inundasaun, ita sei koordena ho autoridade lokal sira hahú Xefe Aldeia no Xefe Suku sira iha Dili laran atu kontribui orienta komunidade sira atu hamos fatin ida-idak, tanba plastiku barak mak soe arbiru hamosu inundasaun,” nia katak.

Alende ne’e, Prezidente Repúblika mós orienta MAE atu halo preparasaun ba hamosu kalan kulturál antes komemora loron restaurasaun 20 de maiu.

“Ami mós simu orientasaun atu halo preparasaun oinsa hamosu kalan kulturál. Kalan kulturál ne’e sei akontese antes tama ba komemorasaun loron espesiál ne’e. Ita sei hala’o iha Dili, atu nune’e ema hotu mai partisipa ho másimu,” nia tenik.

Iha komemorasaun ne’e sei partisipa hosi bainaka internasionál maibé seidauk hatene nasaun ne’ebé mak atu mai partisipa tanba seidauk iha konvite ba Timor-Leste nia nasaun amigu sira.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!