DILI, 13 marsu 2024 (TATOLI)–Ministru Agrikultura, Pekuária, Peska no Floresta, Marcos da Cruz, aprezenta proposta iha reuniaun ordinária Konsellu Ministru (KM), kuarta ne’e, ne’ebé hetan ona aprovasaun.
“Konsellu Ministru delibera hodi autoriza halo despeza relasiona ho kontratu konstrusaun projetu irrigasaun Uatuwa-Modobuti, iha munisípiu Baucau ho valór millaun $26,57, no kontratu ba konstrusaun projetu irrigasaun Irabere, iha suku Irabin de Baixo, iha munisípiu Viqueque ho valór millaun $11,96,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Projetu irrigasaun Maliana II iha ona prosesu konkursu públiku
Ministériu Agrikultura, Pekuária, Peska no Floresta (MAPPF) tau ona prioridade iha tinan 2024 ne’e hodi halo konstrusaun ba irrigasaun boot tolu hanesan Maliana II iha Bobonaro, Vatuva iha Baucau no Irabere iha Viqueque.
Aleinde ne’e, MAPPF mós kontinua projetu harii irrigasaun rua hanesan Lavai iha Lautém no Galata iha Baucau, ne’ebé nia kustu millaun $18. Projetu rua ne’e hahú prosesu aprovizionamentu iha tinan 2023.
Antes ne’e, KM autoriza despeza ba projetu konstrusaun irrigasaun Maliana II no Konsellu Administrasaun Fundu Infraestrutura (CAFI, sigla portugés) aprova ona dezeñu konstrusaun ba irrigasaun refere, tanba ne’e projetu ne’e iha posibilidade implementa iha tinan 2024 hodi distribui bee ba agrikultór sira-nia natar.
Irrigasaun Maliana II ne’e sei fornese bee ba natar sira iha área Urbana iha área ektare 1,500, enkuantu totál orsamentu ne’e ne’ebé MAPPF prevee iha dezenu Bill of Quantity (BoQ) ba konstrusaun irrigasaun Maliana II hamutuk millaun $11.
Irrigasaun ne’ebé eziste iha Timor-Leste hamutuk 27, ne’ebé hosi númeru ne’e 11 mak hadi’a ona liuhosi Programa Nasionál ba Dezenvolvimentu Suku no hosi parseiru sira hanesan Ajénsia Kooperasaun Internasionál Japaun, Departamentu Negósiu Estranjeiru no Komérsiu Austrália no parseiru seluk tan.
Jornalista : Antónia Gusmão
Editora : Julia Chatarina
