COVALIMA, 13 marsu 2024 (TATOLI) – Irrigasaun Maucola ne’ebé konstrui iha tempu okupasaun Indonézia la funsiona iha tinan barak nia laran maka Ministériu Agrikultura, Pekuária, Peska no Floresta (MAPPF), liuhusi Diresaun Nasionál ba Irrigasaun no Jestaun Utilizasaun Água hakarak opera fali irrigasaun ne’e hodi fonese bee ba natar sira.
Ministériu Agrikultura loke ona, iha semana kotuk, bee dalan kilómetru ida-resin hodi liga ba irrigasaun ne’e, iha suku Beco, postu Suai, iha Covalima, tanba dezde nia lafunsiona natar hamutuk ektare 2.300 abandonadu.
Diretór Servisu Munisipál Agrikultura Covalima, Lino Magno, informa katak, hahú iha tempu Indonézia to’o ohin loron agrikultór sira lahalo natar, tanba ne’e foin mak ekipamentu pezadu rua loke fali bee dalan hodi liga ba irrigasaun tuan Maucola ne’ebé kotu hodi bele fornese bee ba natar sira no agrikultór seidauk bele halai natar tanba iha hela prosesu loke bee dalan.
“Timor-Leste dependénsia ba foos importasaun, entaun atu labele depende foos husi rai-li’ur maka tenke hadi’a irrigasaun sira, nune’e agrikultór sira halai natar hodi hasa’e produsaun hare”, nia afirma.
MAPPF mós destaka ona estensionista 30 iha kada suku iha munisípiu Covalima hodi fó asisténsia téknika ba to’os no natar-na’in sira.
Xefe Suku Beco, Armindo Bernardino Lopes, realsa katak natar iha suku Beco maioria abandona tanba irrigasaun Maucola ne’ebé atu distribui bee ba natar sira hodi agrikultór halo natar ne’e lahadi’a.
“Agrikultór sira iha suku Beco abandona natar tanba problema bee laiha no foin lalais ne’e hatún ona ekipamentu pezadu hodi hadi’a ona bee dalan atu liga ba irrgasaun Maucola, maibé ita seidauk bele garante”, nia dehan.
Tanba ne’e, toos-na’in sira iha suku Beco foku de’it ba kuda batar tanba natar bee laiha. Bainhira Governu hadi’a ona irrgasaun hodi fornese bee ba natar maka bele garante hodi hasa’e produsaun hare iha rai-laran.
Suku Beco nia luan área 11.339 , iha nia aldeia 11 ho totál xefe família 1.208 ho nia populasaun 5.490 kompostu husi mane 2.764 feto 2.726.
Notísia relevante: Grupu agrikultór no peskadór iha Covalima simu tratór haat no ró neen husi MAPPF
Jornalista: Celestina Teles
Editora: Maria Auxiliadora
