DILI, 13 marsu 2024 (TATOLI) – Prezidente Repúblika, José Ramos Horta, fó pose ba Embaixadór dezignadu ba Repúblika Cuba, Nivio Leite Magalhaes no Embaixadora dezignada ba Comunidade dos Países da Língua Porutuguesa (CPLP), Laura Soares Abrantes, ba períodu tinan tolu.
“Ohin, Prezidente Republika fó pose ba Nivio Leite Mangalhães nu’udar Embaixadór Repúblika ba Kuba no Laura Soares Abrantes nu’udar Embaixadora ba CPLP”, Vise Ministra Asuntu ASEAN, Milena Maria da Costa Rangel, hafoin serimónia tomada pose, iha Palásiu Prezidensiál, Bairro Pité, ohin.
Milena Maria da Costa Rangel haktuir katak Timor-Leste mós membru ida husi CPLP no iha relasaun di’ak ho Cuba, liuliu iha área saúde no edukasaun. Tanba nee, Timor-Leste presiza tebes prezensa embaixador foun sira ne’e hodi subtutui sira ne’ebé termina ona mandatu.
“Dezde inísiu, ita-nia dipopmata sira iha ona relasaun di’ak ho Cuba hodi koopera iha setór saúde hanesan médiku lubuk ida mak formadu ona husi Cuba. Agora estende tan ba área edukasaun, kultura no agrikultura”, nia informa.
Tuir governante ne’e, Xefe Estadu fó mensajen ba embaixadór nain-rua atu hala’o servisu ho di’ak atu bele hametin liután kooperasuan hodi lori benifisiu ba dezenvolvimentu nasionál.
Iha fatin hanesan, Embaixadora ba CPLP, Laura Abrantes, promete sei asume funsaun ne’e ho responsabilidade no fiar katak misaun ida-ne’e importante hodi reforsa no fortalese relasaun diplomátika entre Timor-Leste no nasaun sira husi CPLP.
“Ita-nia relasaun diplómtika hanesan istória ida ne’ebé atu promove nafatin kresimentu ekonómiku ne’ebé mútua, promove edukasuan no kapasitasaun liuhusi interkambiu, edukasionál, prinsipalmente língua portugeza sai hanesan pontu importante ne’ebé mak akomoda iha CPLP”, Laura Abrantes akresenta.
Diplomata ne’e haktuir tan, presiza iha relasaun di’ak ho CPLP hodi apoia adezaun Timor-Leste ba ASEAN no Estadu Timor-Leste asina ona akordu internasionál ba Organizasaun Mundiál Komérsiu (OMK).
Embaixadór Repúblika Cuba, Nivio Magalhaes, agardese ba Prezidente Pepúblika ne’ebé mak fó konfiansa atu sai hanesan embaxadór Timor-Leste iha Cuba.
“Ha’u agradese ba Prezidente Repúblika, Primeiru-Ministru no membru Governu hotu ne’ebé mak fó konfiansa mai ha’u hodi sai embaixadór Timor-Leste iha Cuba hodi asume responsabilidade atu kontinua halo kooperasaun bilateral ho Cuba”, Nivio Magalhaes relata.
Nia rekorda katak médku timoroan lubuk ida mak formadu iha Cuba no médiku kubanu sira nafatin fó asisténsia médiku ba pasiente sira iha ospitál sira iha Timor-Leste.
“Ha’u sei fó oportunidade ba setór saúde maibé sei esplora setór sira seluk ne’ebé mak importante mai ita-nia rain hanesan edukasaun, juventude, depsortu, agrikultura no seluk tan tanba ne’e ha’u dedika ha’u-nia an tomak hodi halo esforsu atu hala’o servisu ida-ne’e ho susesu. Nune’e planu tolu ne’ebé ha’u iha mak hametin kooperasaun, esplora oportunidade no garante reprezentasaun povu ho dignu”, nia konklui.
Jornalista : Felicidade Ximenes
Editór : Zezito Silva
