Ofisiál F-FDTL na’in-rua sei aranka ba Sudaun Súl tanba misaun pás
DILI, 13 marsu 2024 (TATOLI) – Xefe Estadu Maiór Jerál (F-FDTL), Tenente Jerál Domingos Raul Falur Rate Laek, dehan ofisiál superór na’in-rua sei reprezenta kontijente forsa armada Timor-Leste hodi hala’o misaun pás iha Sudaun Súl.
Ofisiál Superór na’in-rua mak hanesan Majór Infantaria José Martins no Majór Infantaria Agapito Ximenes.
“Ha’u nomeia ona ofisiál na’in-rua atu ba hala’o misaun pás iha Sudaun Súl no sira na’in-rua ne’e ho diviza majór hotu”, Falur Rate Laek hateten ba jornalista sira iha Kuartel Jenerál F-FDTL, kuarta ne’e.
Nia dehan, ofisiál na’in-rua ne’e sei ba ketak iha fulan ida-ne’e, Major Infantaria Jose Martins mak sei ba uluk iha loron (27 3/ 2024), enkuantu Majór Infantaria Agapito sei aranka iha loron 28 marsu tinan ne’e no sira sei hala’o misaun durante tinan ida.
Falur fundamenta katak ba oin sei reforsa lasu kooperasaun ho ONU atu membru F-FDTL bele reprezenta kontijénsia Timor-Leste atu bele partisipa iha misaun pás ONU iha nasaun sira konflitu.
Tanba ezijénsia ne’ebé husi ONU katak Timor-Leste liuliu F-FDTL presiza haruka nia reprezentante hodi hamutuk ho ONU hodi halo misun pás nasaun sira ne’ebé presiza tulun.
“Ba oin ita mós sei haruka ita-nia forsa feto sira hodi ba reprezenta ita-nia forsa iha missun pás iha mundu”, nia adianta.
Falur rekoñese katak antes ne’e, nomeia ona ofisiál F-FDTL feto ida, ho diviza Tenente atu partisipa iha misaun pás iha Sudaun Súl, maibé iha prosesu administrativu balun hosi ONU nian ne’ebé F-FDTL tenke priénse mak la konsege.
Tanba iha kritériu ONU nian katak ofisiál ba forsa ne’ebé mak atu hola parte iha misaun pás ONU tenke ema ne’ebé mak nia lisensiadu iha área agrikultura. Nune’e karik bainhira halo misaun sira bele partilla esperiénsia kona-ba setór agrikultura atu bele ajuda nasaun ne’e bele haforsa sira nia ekonómia nasaun nian.
Tanba ne’e Komandu F-FDTL hato’o ona instrusaun ba Estadu Maiór atu identifika feto F-FDTL ho backgraund edukasaun lisensiadu ba agrikultura hahú tuir formasaun atu, karik pedidu hosi ONU ba misaun pás, komandu bele haruka ofisiál feto ba partisipa iha misaun ne’e.
Rekezitu seluk hosi ONU mak feto forsa armada antes atu ba partisipa iha misaun ONU tenke ba tuir kursu militár nian iha Fransa tanba ne’e komandu sei haree kestaun sira-ne’e.
La’ós ha’u mak lakohi, maibé buat hotu tenke la’o tuir prosesu administrativu ne’ebé interligadu. No prosesu administrativu ONU nian ne’e ulun moras tanba tenke liga sira no liga ba ita-nia Governu. Ho buat sira-ne’e hotu mak ha’u haruka fali ofisiál na’in-rua ne’e, tanba ne’e mak la konsege ita nian ofisiál feto la ba partisipa ne’e”, nia informa.
“Maibé ba oin ha’u sei haree nune’e envolve feto iha misaun pás ONU nian, tanba ita ratifika ona konvesaun ONU 1325 ne’ebé fo oportunidade ba feto envolve iha kualker atividade no ita mós tenke kumpre ida-ne’e hodi fó oportunidade ba sira”, nia konklui.
Jornalista: Natalino Costa
Editór : Zezito Silva
