Xina apoiu fasilidade jinástika ba F-FDTL

DILI, 13 marsu 2024 (TATOLI) – Governu Xina apoiu fasilidade jinástika ba FALINTIL-Forsa Defeza Timor Leste (F-FDTL) atu miltár sira bele uza hodi halo ezersísiu no garante ba saúde militár sira-nian loroloron.

Tuir Xefe Estadu Maiór Jenerál  (F-FDTL), Tenente Jenerál Domingos Raul Falur Rate Laek hatete, Governu Xinez hala’o doasaun hodi apoia fasilidade jinástika ba institusaun F-FDTL atu militár sira uza hodi halo ezersísiu hodi garante ba sira-nia saude ne’ebé di’ak.

“Xina nia apoiu mai Timor-Leste, ne’e laos ba ekipamentu ida-ne’e de’it maibé sira apoiu Governu Timor-Leste desde uluk kedan. Iha área infraestrutura militár, sira halo Kuartel Jenerál ida-ne’e, formasaun militár sira haruka ita-nia forsa sira ba estuda iha akademia militár Xina ne’ebé hamutuk ema100 no apoia ita karreta movél tein nian no apoiu sira seluk”, Falur Rate Laek iha nia intervensaun iha serimónia simu apoiu fasilidade jinástika hosi Governu Xina ne’ebé hala’o iha Kuartel Jenerál F-FDTL Fatuhada, kuarta ne’e.

Nia dehan, relasaun bilaterál Xina ho Timor-Leste durante ne’e la’o di’ak tebes no ba oin sei kontinua nafatin ida-ne’e.

“Ha’u hato’o sinsériu agradesimentu ba apoiu ne’ebé durante Governu Xina fó ona ba forsa armada Timor-Leste, ita sei kontinua mantein koperasaun ida-ne’e”, nia afirma.

Iha fatin hanesan, Embaixadora Xina ba Timor Leste, Wang Wenli mos, dehan Timor-Leste ho Xina iha relasaun bilaterál ne’ebé di’ak to’o agora .

“Ami sei kontinua tulun Timor-Leste liuhosi kooperasaun ne’e iha ona, hanesan iha area militár, ami kompromete kontinua apoia F-FDTL”, nia dehan.

Nia afirma, Xina sei kontinua apoia Timor-Leste hodi dezenvolve nasaun.

Jornalista: Natalino Costa

Editór : Zezito Silva