PNTL apela ba inan-aman fó konsellu ba oan sira hakribit konflitu iha Zumalai
COVALIMA 14 marsu 2024 (TATOLI) – Komandante Eskuadra Zumalai, Inspestór Xefe Polísia, Gaspar Afonso Soares, husu ba inan-aman atu akonsella oan sira hakribit konflitu hodi kria pás no estabilidade.
“Polísia Nasionál Timor-Leste [PNTL] sai hanesan autór ba seguransa, maibé ema hotu iha devér no obrigasaun atu kontribui ba pás hahú husi ita-nian konxiénsia no kolaborasaun ba seguransa iha rai Zumalai sei hakmatek. Inan-aman iha devér no obrigasaun fó konsellu nia oan sira hevita asalta no baku malu atu labele akontese nune’e rai bele hakmatek”, Gaspar Soares hato’o iha salaun parokiál Zumalai, ohin.
Komandante Eskuadra ne’e foin simu knaar husi Komandu munisípiu Covalima iha dezembru 2023, maibé nia garante situasaun iha postu Zumalai to’o ohin loron la’o hakmatek.
“Oinsá mak inan-feton hakbiit sira-nian ekonomia bainhira rai ne’e la hakmatek. Tanba ne’e presiza serbisu hamutuk hodi mantein pás no estabilidade. Se rai la hakmatek empreza sira ta’uk atu investe nia osan. Tanba atu halo investimentu ba dahuluk sei haree uluk seguransa iha rai-laran, la’ós buka uluk mak matenek-na’in sira”, dehan.
Tuir nia, estabilidade sai fatór determinante atu hala’o dezenvolvimentu, tanba bainhira seguransa iha rai-laran la hakmatek, siginifika dezenvolmentu la’o ladún di’ak. Nia husu atu ema hotu serbisu hamutuk hodi fó liman ba malu no banati tuir eroi sira-nian obra luta ba dezenvolviment atu fó moris ba populasaun.
Konstituisaun RDTL iha artigu 147 hatete Polísia no forsa seguransa sira sei defende legalidade demokrátika no garante sidadaun sira-nian seguransa internu, maibé sira labele iha partidu polítiku, prevensaun kriminál tenke hala’o ho respeitu ba direitu umanu no lei maka sei harii rejime ba Polísia nomós forsa seguransa seluk.
Postu administrativu Zumalai, munisípiu Covalima ho nia luan área 283,74 km², iha nia Suku sira hanesan Mape, Usecai, Fatulelo, Lepo, Raimea, Zulo, Lour no Tashilin.
Jornalista: Celestina Teles
Editora: Maria Auxiliadora
