ERMERA, 13 marsu 2024 (TATOLI) – Sekretáriu Estadu Protesaun Sivil (SEPS) hamutuk ho autoridade lokál postu administrativu Ermera, kuarta ne’e, distribui materiál konstrusaun hanesan pregu, arame kesi besi, zinku (kalen tahan), besi baja ho simentu, ba uma-kain hamutuk110 hodi harii hikas sira nia uma ne’ebé afetadu ba dezastre natural ne’ebé akontese iha tinan kotuk.
Sekretáriu tutela, Domingos Mariano Reis, esplika, totál vítima ne’ebé simu materiál rekuperasaun ne’e kompostu husi kategoria tolu (3) hanesan aat liu iha uma kain-65, aat naton uma kain-26 no aat kmaan-19.
“Totál orsamentu ba apoia vítima sira ne’e ho montante $95,900 fahe ba kategoria rua, maun de obra ho transporte ba vítima sira. Kategoria aat liu ne’e simu $1,000 ($850 ba maun de obra no $150 ba aluga transporte). Aat naton simu $750 ($600 ba maun de obra no $150 ba transporte), aat kmaan ne’e simu $600 ($150 ba transporte no $450 ba maun de obra)”, informa ba jornalista sira iha Gleno, Ermera.
José Cruz da Costa hanesan vítima ne’ebé simu pakote apoiu emerjénsia ne’e agradese ba governu tanba bele simu ona material konstrusaun.
“Ha’u-nia uma anin sobu iha dezembru 2023. Pesoalmente, hanesan vítima dezastre naturál, ha’u hato’o agradese wain ba governu liuliu SEPS tanba bele responde ona bá vítima dezastre naturál sira-nia preokupasaun”, nia agradese.
Iha fatin hanesan, Xefe Suku Humboe, Felixberto Ximenes husu ba benefisiáriu sira tenke uza materiál konstrusaun sira ne’e ba harii hikas sira-nia uma ne’ebé mak hetan estragu.
“Sekarik sira balun mak kontra regulamentu, mak ita hamutuk ho parte relevante sei halo investigasaun hodi buka tuir. Nu’udar autoridade lokál ita sei akompaña sira to’o konstrusaun sira-nia uma remata”, nia dehan.
Nune’e mos Komandante Operasionál Autoridade Protesaun Sivil Munisípiu Ermera, Inspektur Xefe Polísia, António da Costa Babo, bolu atensaun ba vítima dezastre naturál ne’ebe simu apoiu ne’e tenke uza materiál konstrusaun sira ne’e hodi harii duni sira-nia uma.
“Sira tenke uza zinku, besi, simentu no materiál seluk ne’ebá mak ohin sira simu ne’e hodi harii duni sira nia uma no labele faan fali ba ema seluk”, nia apela.
Komandante Operasionál ne’e akresenta sei hamutuk ho autoridade lokál inklui xefe suku no xefe aldeia hodi forma ekipa ida hodi kontrola no monitoriza prosesu konstrusaun uma to’o remata. “Karik sira balun kontra regulamentu hanesan faan fali material sira ne’e mak ita sei prosesa”.
Nia relata katak uma kain sira ne’ebé mak hetan estragu totál mak simu material kompletu, hanesan zinku (kalen tahan) 50, besi 50, simentu saka 50, entretanto ba uma ne’ebé hetan estragu kmaan simu de’it zinku ho kuantidade hanesan.
Iha semana kotuk SEPS entrega ona materiál rekuperasaun ba vítima dezastre naturál hamutuk 146 husi postu administrativu Atsabe, Hatulia A, Hatulia B, Letefoho no Railaku.
Ho situasaun atuál udan no anin ne’ebé akontese iha territóriu tomak, SEPS alerta ba populasaun hotu hadook aan husi fatin risku: “labele hela besik iha ai-hun boot sira, dok husi mota ninin, labele besik iha tasi ibun no labele besik ba rai ne’ebé risku ba erozaun”.
Sekretáriu Estadu ne’e garante katak Autoridade Protesaun Sivíl sei servisu ho firme no prontidaun durante orás 24 hodi fó assisténsia no responde emerjénsia bainhira akontese dezastre naturál.
Jornalista: Afonso do Rosário
Editór: Filomeno Martins
