CAC simu keixa hosi públiku hamutuk 80 maioria lagosta malu
DILI, 15 marsu 2024 (TATOLI)—Komisaun Antí-Korrupsaun (CAC, sigla portugés) simu ona keixa hosi públiku hamutuk 80-resin.
“Durante ami-nia Komisáriu laiha, ami mós nafatin atende denúnsia ka keixa hosi públiku, ne’ebé iha tinan 2023 CAC simu keixa hosi públiku hamutuk 80-resin. Hosi ne’e investigadór sira tenke análiza keixa sira, hafoin analiza hosi kazu sira ne’e, kazu 50 mak laiha indísiu krime,” Diretór Investigasaun CAC, José de Araújo Verdial, relata ba Agênca Tatoli, iha ninia knaar fatin, Farol, sesta ne’e.
Keixa 50 ne’ebé laiha indísiu krime ne’e ein ternu aktu administrativu de’it, katak dala ruma lagosta malu entaun ba keixa iha CAC.
“Atu dehan katak keixa hotu ne’ebé tama ami la prosesa kedas maibé sei analiza no halibur informasaun. Kuandu iha natureza krime halo aberiguasaun, entaun tinan 2023 ami konsege halo auto partisipasaun ba Ministériu Públiku hamutuk 16,” nia akresenta.
Notísia relevante : Parlamentu Nasionál adia eleisaun komisáriu CAC
Durante laiha Komisáriu CAC, atividade iha terrenu mak la la’o maibé ein administrativu hanesan analiza ba informasaun sira kontinua.
“Hanesan Unidade Informasaun Seguransa nia serbisu maka bainhira haree iha públiku indísiu korrupsaun ami-nia investigadór sira halibur kedas informasaun ne’ebé hanaran abriguasaun,” Diretór tenik.
Molok Komisáriu nia mandatu hotu ein termu serbisu investigasaun, investigadór sira hetan delegasaun hosi Ministériu Públiku iha kazu 66.
“Kazu 66 ne’e hosi janeiru to’o abríl 2023 molok mandatu Komisáriu CAC ramata, ami konsege finaliza kazu hamutuk 21, no relatóriu finál ami submete ona ba Ministériu Públiku, entaun ami hela ho kazu 45, kazu sira ne’e maioria krime korrupsaun,” nia dehan.
Maski laiha Komisáriu maibé investigadór sira kontinua halo serbisu tanba dokumentu barak mak halibur tiha ona no rona ona sasin barak, nune’e iha konkluzaun préviu ba prosesu ne’e.
Aleinde ne’e, kontinua halo mapeamentu ba tratamentu no dokumentu nesesáriu sira ne’ebé mak bele utiliza hanesan prova investigasaun.
Jornalista : Antónia Gusmão
Editora : Julia Chatarina
