iklan

EKONOMIA, MUNISÍPIU, VIQUEQUE

MAPPF deside jere rasik sentru agro-komérsiu Raitahu

MAPPF deside jere rasik sentru agro-komérsiu Raitahu

Ministru Agrikultura, Peska, Pekuária no Floresta (MAPPF), Marcos da Cruz.Imajen Tatoli/ Vitorino Lopes da Costa

VIQUEQUE, 15 marsu 2024 (TATOLI)- Ministru Agrikultura, Peska, Pekuária no Floresta (MAPPF), Marcos da Cruz, hatete, MAPPF liuhosi Servisu Agrikultura Munisípiu Viqueque mak sei jere direta sentru agro-komérsiu Raitahu, ne’ebé lokaliza iha suku Uma Uain Kraik, postu Viqueque Vila, munisípiu Viqueque tanba abandona durante tinan ida.

Antes ne’e abitante no autoridade postu Viqueque Vila mak entrega rai ektare 145 ba  Governu  liuhosi MAPPF hodi  estabelese sentru agro-komérsiu  hodi dezenvolve setór agrikultura integradu hanesan pekuária, peska no planta indústria.

“Ha’u mai vizita direta ba sentru ida-ne’e hodi hamoris fila fali sentru ida-ne’e. Maibé sei jere rasik husi MAPPF liuliu funsionáriu agrikultura munisípiu Viqueque. Tanba antes ne’e Governu anteriór fó konfiasa ba  organizasaun Antigu Alunu timor-oan no Arava Insternational  Center For Agrikulture Training (AICAT)  hamutuk na’in-25 maka jere maibé abandona tiha”,  Ministru Marcos hateten ba jornalista sira, hafoin vizita fasilidade sira iha sentru agró-komérsiu Raitahu, sesta ne’e.

Governante ne’e hakarak hamoris fali atu sai mós sentru formasaun integradu ba setór agrikultura, peska no planta indústria.

“Ha’u mós koordena ona funsionáriu agrikultura no alumi AICAT na’in haat no abitante Viqueque na’in 10, ne’ebé durante ne’e  voluntária iha sentru ida-ne’e no ami sei fó kontratu ba sira hodi servisu fali iha sentru ida-ne’e”, nia promete.

MAAPF mós eskolla ona funisionáriu servisu agrikultura munisípiu Viqueque, Julio Pinto Ribeiro hodi sai jestór ba sentru agrikultura Raitahu hodi hamutuk ho nia traballadór na’in-14.

“Ha’u ba fali Dili sei koordena ho sekretáriu Estadu Peska no Sekretáriu Estadu Pekuária hodi tau orsamentu atu nune’e sentru ida-ne’e la’o fila fali ba oin sai sentru formasaun agrikultura no sai ezemplu ba agrikultór sira”, nia espera.

Iha fatin hanesan, Xefe aldeia Bosabein, suku Uma Uain Kraik,  Leão Soares, sente triste tanba haree sentru ida-ne’e AICAT abandona no duut maka sai nakonu, nume’e presiza duni  MAPPF mak jere rasik.

“Ami loro-loron haree fatin ida-ne’e triste tanba Governu investe tiha orsamentu, maibé asosiasaun jere ida-ne’e laiha responsavél hodi abandona sentru  ida-ne’e. Tanba ami oferese ona rai ba Governu hodi halo dezenvolvimentu setór agrikultura modernu agora sai hanesan ne’e ami laran triste. Tan ne’e ami husu ba Governu liuliu MAPPF jere rasik sentru ida-ne’e atu nune’e sai di’ak liután”. Nia sujere.

Fó hanoin fali katak sentru integradu Agro-Komérsiu Raitahu hahú abertura iha loron tersa 5  outubru 2021 sai hanesan projetu pilotu   área  potensiál, estratéjiku sei sai baze dezenvolvimentu ekonomia iha kosta sul.

Governu  aloka orsamentu ba implementasaun sentru integradu ne’e Ghovernu hamutuk rihun $650.

Fasilidade ne’ebé estabelese ona iha sentru ne’e maka hanesan fatin viveiru planta indústria, kolam, manu luan, aramzén no fasilidade karreta truck ida, kazerna ida no eskritóriu ida.

Notísia relevante: Antigu alunu AICAT na’in-lima mantein serbisu voluntáriu iha sentru agro-komérsiu Raitahu

Jornalista : Vitorino Lopes da Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!