VIQUEQUE, 15 marsu 2024 (TATOLI)-Ministru Agrikultura, Peska, Pekuária no Floresta (MAPPF), Marcos da Cruz hamutuk ho Sekretáriu Estadu Peska (SEP), Domingos da Conceição dos Santos, sesta ne’e, kolleta ikan nila tonelada ida-resin, iha sentru viveiru ikan-oan ne’ebé lokaliza iha suku Loihunu, postu Ossu, munisípiu Viqueque.
Sentru viveiru ne’e establese hosi MAPPF no jere hosi servisu Agrikultura munisípiu Viqueque atu prepara ikan oan no halo distribuisaun gratuita ba ba povu akikultura iha área refere inklui munisípiu sira seluk.
“Ohin, ami kolleta ikan nila sira-ne’e ho tonelada ida. Razaun kolleta tanba ikan hirak ne’e la prodús ona ikan fini ka ikan oan”, Ministru Marcos hatete ba Agência TATOLI,I.P iha suku Loihuno.
Nune’e, Governante ne’e afirma kolleta hotu hodi sosa fali ikan oan no husik fali atubele produs fali ikan fini hodi bele distribui gratuitu ba povu akikultura sira.
Tanba ne’e, Ministru Marcos husu ba abitante munisípiu Viqueque ne’ebé maka iha interese atu hakia’k ikan bele ba foti iha sentru ne’e.
“Hakiak ikan bele hetan osan no bele konsumu atu fó nutrisaun di-ak hodi haredus malnutrisaun iha Timor-Leste,” ministru enkoraja.
Iha fatin hanesan, Sekretáriu munisípiu Viqueque, Teotónio Sarmento da Silva, agradese Ministru Marcos tanba bele partisipa serémonia kolleta ikan hodi enkoraja abitante sira atubele hakiak ikan barak liután.
“Hafoin kolleta hotu ita-nia tékniku agrikultór sira bele dezenvovolve sentru ida-ne’e hodi fornese ikan oan ba ita-nia abitante Viqueque no munisípiu seluk”. Nia hato’o.
Alende kolleta ikan, MAPPF mós inaugura armazén no kazerna ba funsionáriu viveiru Loihuno ne’ebé konstrui husi empreza Camelão Unip, Lda iha tinan 2023, konstrui kazerna ne’e ho medida 6×9, ne’ebé ho kustu konstrusaun hamutuk $32.400 no armazén ho medida 9×9 rai ikan ninia hahán ho totál gastu $26.400.
Notísia relevante:Benefisiáriu 300-resin hetan fundu $49.308 hodi haki’ak ikan
Jornalista : Vitorino Lopes da Costa
Editór : Florencio Miranda Ximenes
