iklan

COVALIMA, HEADLINE

World Vision implementa programa foun Hakbiit Ekonomia Família iha Tilomar-Zumalai

World Vision implementa programa foun Hakbiit Ekonomia Família iha Tilomar-Zumalai

Logo World Vision

COVALIMA, 15 marsu 2024 (TATOLI) –  Organizasaun Internasionál World Vision implementa, iha tinan ne’e, programa foun Hakbiit Ekonomia Família no Sosiedade, iha postu Zumalai no Tilomar, iha munisípiu Covalima, ne’ebé foka liubá labarik no feto vulneravel sira.

Programa refere sei realiza iha suku haat mak hanesan Maudemo, Casabauk, Tashilin no Lour iha postu administrativu rua ne’e.

“Programa foun ne’e apoia husi Uniaun Europeia ba hakbiit feto iha vida ekonomia família no sosiedade ne’ebé sei implementa durante tinan tolu”, Jerente interinu World Vision Covalima, Tomás Amaral, hatete iha Suai, ohin.

Atividade ne’e implementa iha 2024 to’o 2026 ne’ebé hetan apoiu finanseira husi Uniaun Europeia hamutuk milliaun-ida resin.

Programa ne’e hakarak empodera, kapasita feto iha atividade artezenatu hanesan homan lafatik, soru tais, atubele hetan osan hodi forma grupu rai no empresta osan no bele mós halo negósiu sira seluk. Dadaun ne’e, World Vision forma ona grupu rai no empresta osan iha aldeia ualu.

“Mane sira fó biban ba ita-nian feto maluk liberdade hodi deside hamutuk iha uma laran, hadi’a sira-nian moris. Tanba dalabarak feto sira atu envolve iha atividade ruma, mane sira dehan feto sira iha uma de’it”, nia afirma.

Xefe Suku Maudemo, Maria Fátima, konfirma katak World Vision implementa ona nia programa refere ba grupu sobrevivente, iha suku Maudemo, ne’ebé hala’o iha aldeia hotu.

Reprezentante Diretora Fokupers, Silveiro de Araújo, lembra katak organizaun naun-governamentál ne’e hari iha okupasaun Indonésia, iha 1997, ne’ebé ema barak hetan torturasaun ba violasaun seksuál no intimidasaun, Tanba ne’e, Fokupers iha inisitiva ida hamriik oinsá atu defende direitu feto nian, luta ba autodeterminasaun to’o Timor-Leste hetan nia independénsia.

Fokupers nafatin ko’alia kona-ba direitu feto no labarik feto ho nia programa hanesan servisu administrasaun finansa, konsensializasaun no advokasia, asisténsia ba vítima no uma ba balarik.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!