iklan

EKONOMIA, ERMERA, HEADLINE

Akadémiku: Timor-Leste persiza hasae produsaun Kafé Híbridu Timor

Akadémiku: Timor-Leste persiza hasae produsaun Kafé Híbridu Timor

Peskizador Kafé husi East Timor Coffee Institute (ETCI)/Imajen Tatoli/Filomeno Martins

ERMERA, 16 marsu 2024 (TATOLI) – Peskizador husi East Timor Coffee Institute (ETCI), Gleno-Ermera, Julio de Jesus Gomes husu ba Governu Timor-Leste, liu-liu Ministériu Agrikultura, Peska, Pekuária no Florensta (MAPPF) no parte relevante atu produz kafé oan husi Kafé Híbridu Timor ho kuantidade boot hodi hasae produsaun kafé iha Timor-Leste.

Kafé Híbridu Timor ninia orijen husi Timor-Leste, maibé seidauk iha inisiativa husi Timoroan rasik hodi hasae produsaun husi kafé ne’e iha rai laran.

Julio dehan Timor-Leste persiza porduz kafé hibridu oan barak tanba tuir rezultadu peskiza akadémiku hatudu katak kafé refere iha rezistensia di’ak ba pesti no moras oin-oin.  

“Governu, hamutuk ho stakeholder sira tenke foti insiativa hodi produz Kafe Híbridu Timor barak. Ita mak nain ba kafé ne’e, maibé tanba sa laiha produsaun?” Julio ba Jornalista Tatoli iha nia knaar fatin, ETCI Gleno, Ermera.

Nia reforsa katak atu dezenvolve di’ak liután Kafe Híbridu Timor, Governo persiza kolabora ho akadémiku no stakeholder sira atu oinsa kria planu no programa di’ak hodi implementa programa hasae produsaun kafe refere.

“Kolaborasaun entre governu, stakeholder, no akadémiku sai xave importante ba dezenvolvimentu kafé refere. Primeiru, ita tenke iha estudu klean ida ba Kafe Híbridu Timor. Ezemplu, iha ETCI, ita kuda ona kafé híbridu oan lubun ida. Maibé atu produz kafé ne’e ho kuantidade boot, ita persiza intervensaun seriu husi governu no kompania sosa kafé sira,” dehan.

Relasiona ho plantasaun kafé Timor ne’ebé mak persiza ai-mahon, Julio sujere atu governu no kampania sosa kafé sira buka dalan oinsa mak bele itroduz kafe ne’ebé la persiza ai-mahon.

“Ba oin, buat ne’ebé ita persiza hare mak bele ka lae, ita introduz kafé ne’ebé la persiza ai-mahon mai Timor-Leste. Kafe ne’e kuda la persiza ai-mahon. Kafé refere ita bele introduz husi brazil, Thailandia no nasaun seluk,” Julio sujere.

Akadémiku ne’e esplika katak molok halo introdusaun persiza halo estudu liu husi projetu pilotu ruma atu hare katak kafé ida la persiza ai-mahon ne’e bele adapta no moris iha Timor-Leste ka lae: “Liu husi estudu mak ita bele hatene.”

Nia relata katak nu’udar institusaun ne’ebé halo estudu barak ba kafé, ETCI kria ona ezemplu Prátika Kuda Kafé Di’ak barak iha munisípiu Ermera no mos munisipiu seluk.

“Ita mos halo ona sosializasaun ba komunidade sira oinsa mak hasae produsaun kafé liu husi Prátika Kuda Kafe Di’ak hodi hasae hikas produsaun kafé iha munisípiu Ermera,” nia salienta.

Tuir dadus Agrikultura Munisípal Ermera, entre postu administrative sira iha Munisípiu Ermera, Hatulia A mak iha pontesia boot ba plantasaun kafé ho area hamutuk ektare 11,375, tuir kedas ho Postu Administrativu Letefoho ho area ektare 7,814, Ermera ho ektare 7,621, Hatulia B ho ektare 4,500, Atsabe ho ektare 2,529, no area ki’ikoan liu mak Railako ho ektare 216.

Jornalista: Afonso do Rosario

Editór       : Filomeno Martins 

iklan
iklan

Leave a Reply

iklan
error: Content is protected !!