iklan

ERMERA, HEADLINE, LEI

Autoridade lokál husu aselera prosesu reativasaun ‘Tara Bandu’

Autoridade lokál husu aselera prosesu reativasaun ‘Tara Bandu’

Imajen Special

ERMERA, 17 marsu 2024 (TATOLI) – Administrador Postu Administrativu Hatulia B foun, Sertório dos Santos Madeira hateten ‘Tara Bandu’ hatudu ona ninia rezultadu pozitivu, liuliu fo benefísiu ba família kbiit laek sira hodi suporta sira nia oan ba eskola.

Tanba ne’e, líder lokal ne’e husu ba autoridade kompetente iha munisípiu Ermera atu aselera prosesu reativa ‘Tara Bandu’ ba iha Postu Administrativu no Suku sira.

Nia informa katak inan aman barak husi família mukit iha Munisípiu Ermera mak gasta osan barak husi produsaun kafe ba ‘fetosaan-umane’ no seluk tan.

“Ami apresia ho lei ‘Tara Bandu’ ne’e tanba fó benefísiu ba komunidade sira. Iha Timor-Leste, ensinu superior sira hahú simu rejistrasaun estudante foun iha janeiru ba leten maibé iha periódu ne’e komunidade sira infrenta situasaun ida ne’ebé difísil tebes tanba osan kafé nian gasta tiha … no oan sira atu tama eskola osan laiha,” Sertório ba Tatoli, iha nia knaar fatin, Hatulia B.

Líder lokál ne’e subliña katak ‘Tara Bandu’ limita prátika no aktividade ‘fetosaan-umane’ hodi ajuda komunidade rai osan selu oan ba eskola no halo buat nesesariu seluk.

Nia dehan halo lia ‘fetosaan-umane’ “kontribui ba oan sira la eskola no kontribui mós ba má nutrisaun aas tebes iha munisípiu Ermera.”

“Ami apresia no prontu reativa fali ‘Tara Bandu’ ne’e. Hanesan administradór Hatolia B, ami prontu ezekuta orden bainhira iha ona orientasaun husi autoridade relevante.”

Sertório akresenta katak lei tarabandu ne’e kapás tebes “hanesan Ermera oan sei halo aproximasaun ho komunidade atu minimiza tiha gastus (gasta osan) ba atividade sira ne’ebé la fó benefísiu ba hamenus raes badak no má nutrisaun iha postu administrativu Hatolia B.”

Iha loron 29 dezembru 2023, Prezidente Autoridade Munisípiu (PAM) Ermera sesante, Eusebio Salsinha hamutuk ho líder relijioza, autoridade lokál, Polísia Nasionál Timor-Leste (PNTL), no veteranus halo lansamentu ba regulamentu ‘Tara Bandu’ iha Munisípiu Ermera hodi reduz prátika fetosaan-umane.

 

Jornalista: Afonso do Rosario

Editor: Filomeno Martins 

iklan
iklan

Leave a Reply

iklan
error: Content is protected !!