Eletrisidade mate kleur difikulta profesional saúde fo partu ba inan isin-rua
ERMERA, 17 marsu 2024 (TATOLI) – Eletrisidade ne’ebé baibain mate kleur iha munisípiu Ermera difikulta servisu profesional saúde liuliu fo partu ba inan isin-rua sira.
Profesional saúde konsidera situasaun eletrisidade mate lakan bele fo perigu ba inan-isin rua sira nia vida bainhira fo partu hela.
“Ami presiza eletrisidade lakan para ami uza ventouse no suction hodi fo partu ba inan-isin rua sira. Se ahi mate kleur hanesan ne’e, ami labele halo buat ida. Tanba inan isin-rua ne’ebé mak partu kleur (partu prolongada) ne’e persiza ventouse no suction. Ekipamentu rua ne’e persiza eletrisidade,” Koordenadora Parteira Maternidade Postu Administrativu Atsabe, Munisípiu Ermera, Guida de Jesus Gonçalve ba Tatoli, iha nia knaar fatin.
Nia relata katak bainhira iha tempu emerjensia ruma hanesan prosesu fo partu lao hela mak ahi mate, Maternindade Atsabe hamutuk ho família pasiente tenke empresta jerador.
“Eletrisidade ida mai husi Gleno ne’e mak sempre mate hela de’it. Iha ne’e eletrisidade mate loron tolu (3) ona. Ida ne’e difikulta tebes ita nia servisu. Entaun, baibain ne’e, ami empresta jerador no pasiente nia família mak ense gazolina,” Guida subliña.
Nia hato’o katak maske ho situasaun difísil, durante ne’e Maternidade Atsabe so refere deit inan isin-rua ho bebé toba tesik no bebe ne’ebé persiza inkubator mak ba CHC Gleno no HNGV.
Enkuantu, koalia konaba medikamentu iha Maternidade Atsabe, Guida relata katak Vitamina K ba bebé foin moris mak stockout besik fulan tolu (3) ona: “Ita mos persiza tan antibiotik hanesan ampicillin, gentamicin no metronidazole ba inan isin-rua sira ne’ebé mak sofre moras sepse.”
Nia informa katak hodi responde ba problema medikamentu stockout, parte Farmásia Sentru Saúde Atsabe hato’o ona pedidu ba Farmásia Munisípal iha Gleno: “Aimoruk sira ne’e horseik mai ona, maibé ita seidauk ba check.”
Iha ínisiu 2024, Maternidade Atsabe fo partu hamutuk 55, inklui 19 iha janeiru, 24 iha fevereiru no 12 iha marsu.
Iha sorin seluk, Xefe Sentru Saúde Gleno, Alcina Fernandes da Silva mos reiteira katak eletrisidade ne’ebé sempre mate fo impaktu boot ba servisu parteira no médiku sira-nian iha Sentru Saúde Gleno (CHC Gleno).
“Ahi mate hela deit ne’e difikulta tebes ba parteira no médiku sira-nia servisu iha Maternidade CHC Gleno. Sira babain sempre uza lampra deit. Ida ne’e mak ita nia preokupasaun. Maibé ida ne’e la signifika katak ita tenke hapara ita nia aktividade fo partu,” Alcina subliña.
Jestora Guida no Alcina husu ba parte kompetente atu fornese jerador hodi fasilita parteira no médiku sira nia servisu durante situasaun emerjensia.
Problema eletrisidade mate lakan lá’os deit sai preokupasaun boot ba pesoal saúde, maibé ba mos autoridade lokál no komunidade iha area remota.
“Eletrisidade saida mak lakan dala ida deit mate ona. Ida ne’e sala ne’e iha saida? Iha Atsabe vila ne’e mate loron tolu (3) ona. Maibé, iha Suku Laclo ho Parami, eletrisidade la lakan fulan rua (2) ona,” lamenta Florentino Soares, Xefe Suku Laclo, Postu Administrativu Atsabe, Munisípiu Ermera.
Iha fatin hanesan, Guilherme Mendonça, Xefe Seksaun Planeamentu Postu Administrativu Atsabe hato’o mos lamentasaun konaba problema eletrisidade mate lakan tanba afeta tebes servisiu administrasaun Atsabe nian.
“Semana ida nia laran, ahi sempre mate loron rua (2) ou tolu (3). Entaun, ida ne’e difikulta tebes atendimentu públiku iha Administrasaun Postu Atsabe. Ita husu ba parte kompetente, liuliu Sekretáriu Estadu Eletrisidade, Bee no Saneamentu, no EDTL Munisípiu Ermera bele taun atensaun hela ba problema eletrisidade ida ne’e para ita bele fasilita servisu administrasaun públika no aktividade seluk hanesan labarik estudante sira persiza estuda iha kalan,” Guilherme preokupa.
Jornalista Tatoli koko konfirma ho Diretór EDTL Ermera, Asunção Pinto konaba problema eletrisidade mate lakan iha Munisípiu refere maibé, nia laiha fatin tanba halao hela manutensaun ba sistema eletrisidade avaria iha Postu Administrativu Letefoho.
Jornalista: Afonso do Rosario
Editór: Filomeno Martins
