DILI, 17 marsu 2024 (TATOLI) – Estrada diresaun liga Kapitál Gleno ho Postu Administrativu Letefoho no Atsabe iha kondisaun grave hodi nune’e autoridade lokál husu Governu, liuliu Ministériu Obras Públikas (MOP) atu tau mos atensaun ba Estrada refere.
Guilherme Mendonça lori Adminsitrador Postu Administrativu nian naran husu ba parte kompetente, liuliu MOP atu tau atensaun ba estrada ligasaun husi Gleno mai postu administrativu Letefoho no Atsabe tanba konsidera grave nune’e difikulta komunidade sira atu halo movimentu.
“MOP tenke apoia mákina pezadu ruma mai halo normalizasaun ba estrada atu nune’e bele fasilita komunidade tula sira-nia produtu lokál ba merkadu.
Ho preokupasaun boot hakarak aselera prosesu normalizasaun estrada refere, autoridade lokál suku 12 halo ona proposta no administradór postu administrativu Atsabe entrega ona ba Servisu Obras Públika munisípiu Ermera, no ba mos MOP iha nasionál.
Preokupasaun hanesan hato’o mos husi xefe suku Laclo, Florentino Soares, liga ho kondisaun Estrada diresaun Gleno-Letefoho-Atsabe ne’ebé mak aat ba beibeik.
Nia dehan estrada refere sempre sai matéria kampaña polítika iha kada eleisaun, maibé promesa hotu seidauk tau ba prátika.
“Ami nia hakarak ne’e Estrada ne’e mak diak para komunidade lori nia produtu lokál ba kapitál ne’e osan transporte nian ne’e labele karun. Se estrada aat hela hanesan ne’e, komunidade atu ba faan sira nia sasán iha sidade mos tenke selu karun ba transporte,” Autoridade lokal ne’e lamenta.
Nia realsa katak ho estrada ne’ebé mak kondisaun grave fo mos impaktu ba serbisu governu: “Hau lori povu Laclo nia naran husu ba governu atu mai hadia netik ami nia dalan ne’e ba. Kondisaun grave ne’e hahú kedas husi kruzamentu Suku Humboe mai to’o Postu Administrativu Atsabe.”
Jornalista Tatoli tenta konfirma asuntu refere liga ho proposta ne’ebé mak submete ona husi autoridade Postu Adminsitrativu Atsabe ba Diresaun Obras Públikas Munisípiu Ermera, maibé diretór laiha fatin.
Jornalista: Afonso do Rosario
Editór: Filomeno Martins
