DILI, 18 marsu 2024 (TATOLI)—Deputadu hosi bankada CNRT, Gabriel Soares, husu ba Eletrisidade de Timor-Leste, Empreza Públika (EDTL, E.P) atu kontrola sidadaun ka kliente balun ne’ebé kontinua dada ahí ilegál.
“Husu EDTL, E.P halo kontrolu másimu ba iha kliente sira hotu-hotu, tanba ita rona no haree katak sei iha indivídu ida ka rua sei uza ka dada hela ahí ilegál, ”’ nia levanta liuhosi reuniaun plenária PN, segunda ne’e.
Hanesan, nia dehan, iha mídia sosiál ne´ebe viral loos iha munisípiu Manatuto, postu Barique iha suku Aviaun kuaze uma-kain 70 mak la´o hela ho aktu dada ahí ilegál, ida ne’e bele fó prezuiju boot ba Orsamentu Jerál Estadu (OJE), tanba ida-ne’e EDTL bele halo kontrolu másimu no bele identifika kliente sira-ne’ebé dada ahi ilegál.
Deputada CNRT, Cedelízia Faria dos Santos, foti kestaun fiu eletrisidade ne´ebé dada ba-mai sabraut ne´e, oinsá mak téknika EDTL, E.P organiza fali fiu sira iha riin eletrisidade nian, nune’e husu EDTL, E.P atu haree oinsá rekolla mós reseita husi ne’eba.
“Ha´u hatene katak fiu sira-ne’eba la’ós hosi EDTL, E.P de’it, maibé iha mós ita-nia fornesedór telekomunikasaun sira, hanoin fiu ne’e balun mós parese housi tempu Indonézia to’o agora ita seida’uk organiza, atu aumenta mós reseita ba Estadu. Se bele karik ita-nia oferesedór telekomunikasaun sira-nia fiu karik haruka aluga selu ba Governu, ho ida ne’e bele hatama mós reseita ba Estadu. Ita preokupa mós reseita ne’ebé sei ki’ik, entaun hanoin meiu sira-ne’e hotu ita bele halo fila-fali fiu sira ne’e re-organiza didi’ak. Se sira uza sasán Estadu nian, husu sira tenke selu, ” nia rekomenda.
Deputada CNRT, Carminda Carlota, levanta kestaun ahí mate iha postu Lolotoe ne’ebé mate kuaze semana ida-resin ona, inklui fiu sira monu ba rai hotu tanba impaktu hosi udan boot, nune’e husu EDTL, E.P atu tau atensaun.
Vise Ministru ba asuntu Parlamentár, Adérito Hugo da Costa, rejista preokupasaun Deputadu sira-nia no sei haruka ba parte ministériu relevante atu tau atensaun.
Jornalista : Nelson de Sousa
Editór : Canio Ximenes
