iklan

POLÍTIKA

Governu presiza halo intervensaun emerjénsia ba estragu hosi dezastre naturál

Governu presiza halo intervensaun emerjénsia ba estragu hosi dezastre naturál

Imajen Tatoli/Filomeno Martins

DILI, 18 marsu 2024 (TATOLI)—Reprezentante povu iha Parlamentu Nasionál (PN) husu Governu liuhosi ministériu kompetente atu halo intervensaun emerjénsia ba infraestrutura ne’ebé hetan estragu hosi dezastre naturál impaktu hosi udan boot loron hirak liu ba.

“Estrada iha suku Lupa, postu administrativu Lolotoe, ne’ebé iha akontesimentu rai halai  taka tomak estrada ne’ebé liga postu Lolotoe ho munisípiu Covalima, ho nune’e transporte públiku no privadu labele halo movimentu tanba impaktu hosi udan ne’ebé boot akontese kuaze semana ida ona iha territóriu tomak. Tanba ne’e, ami husu Ministériu Obra Públika liuliu ba IGEADE, I.P munisípiu Bobonaro atu lori ekipamentu pezadu ba lalais fatin refere,” Deputada CNRT, Carminda Carlota, levanta liuhosi reuniaun plenária PN, segunda ne’e.

Ho nune´e, nia husu, presiza hetan normaliza hikas ba estrada hodi bele hetan fali asesu ba movimentu transporte publiku no privadu hodi garante movimentu komunidade iha area refere

Deputadu FRETILIN, Antoninho Doutel Sarmento, foti preokupasaun inundasaun semana kotuk iha munisípiu Manufahi, postu Alas, parte suku Mauberloi ne’ebé iha tempu udan boot sempre sobu komunidade nia uma no komunidade halai sai hosi sira-nia hela fatin ba fatin seluk.

Bee sobu komunidade nia uma iha ne’eba akontese beibeik ona kada tinan, tanba kauza hosi mota tun ho bee-mota ne´ebé suli ho velosidade makaas no bee halai sai hosi bee dalan, hodi tama komunidade nia uma inklui estraga ai-horis ho hahán ne’ebé komunidade kuda.

“Atu rezolve ida-ne’e, Governu tenke aselera finaliza tiha konstrusaun ba projetu emerjénsia iha ne’eba, ne’ebé agora daudaun iha hela prosesu konstrusaun,” nia hateten.

Deputada CNRT, Oscar de Araújo, hakarak husu ba IGEADE, I.P atu halo intervensaun urjente hasai sedimentasaun rai sira-ne’ebé taka hela estrada impaktu hosi udan liuhosi área Kasnafar nian atu ba Aileu, no husu mós kompañia ne’ebé responsabiliza obra iha Kasnafar nian atu finaliza lalais.

Deputada CNRT, Cedelízia Faria dos Santos, hato’o preokupasaun komunidade hosi Baucau ne’ebé simu hosi komunidade liga ho natar ne’ebé iha Buibau-Samalari nian ne’ebé benefisiáriu la’ós mai hosi suku ida-ne’e de’it, maibé mai hosi suku lima hanesan Buibau, Samalari, Buruma, Trilolo, Seical ne’ebé mak asesu bee mai hosi natar maibé natar ne’e mota sobu.

Tanba ne´e, populasaun husu ba Ministériu Obra Públika (MOP) atu bele harii fali moru protesaun ba mota sira-ne’e hodi bele proteje bee-mota suli fali ba natar.

“Komunidade mós hatete, hatama ona proposta ba Ministeriu Obra Públika no iha ona ekipa téknika hosi MOP tun ona ba identifika ona fatin ne’e, maibé to’o agora paradu tiha de’it, lahatene nia andamentu to’o ona iha ne’ebé,” nia hateten.

Vise Ministru ba asuntu Parlamentár, Adérito Hugo da Costa, rejista preokupasaun Deputadu sira-nia no sei enkamina ba ministériu relevante hodi bele tau atensaun.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!