iklan

COVALIMA, POLÍTIKA

Komunidade difísil asesu estrada iha tempu udan

Komunidade difísil asesu estrada iha tempu udan

Imajen Tatoli/Filomeno Martins

COVALIMA, 18 marsu 2024 (TATOLI) – Populasaun iha suku 30 iha Covalima iha postu administrativu hitu maioria asesu ona estrada rurál, maibé iha tempu udan difikulta atu halo movimentu tanba estrada nakonu ho tahu.

Xefe suku Fohorem, Júlio Ferreira Alves, husu ba Servisu Munisipál Obra Públika Covalima atu normaliza estrada iha postu Fohorem bá Suai, tanba kondisaun grave tebes nune’e bele fasilita transporte públiku halo movimentu, nomós komunidade sira bele lori sira-nian produtu lokál bá merkadu.

“Kondisaun estrada husi postu administrativu Fohorem liga bá kapital Suai la’ós ona estrada, maibé nakfila sai ona ba mota, tanba  udan-boot no laiha valeta entaun estraga dalan, nune’e presiza halo normalizasaun”, Júlio Alves hato’o.

Xefe suku Labarai, Paulo de Sena, reforsa katak tanba estrada nakonu ho tahu maka halo komunidade sira dudu de’it motorizada. “Kondisaun estrada iha tempu udan grave, tanba motorizada sira ne’e ita dudu de’it no halo ita baruk atu halo movimentu, liuliu ba estudante sira bá eskola ne’e sira-nian sapatu ho tahu de’it hafoin to’o eskola mak sira hamoos”, nia dehan

Diretór  Servisu Munisipál Obra Públika, Sidónio Gusmão,  klarifika katak, tuir lavantamentu dadus, komunidade iha suku 30 maioria asesu ona estrada rurál, tanba ne’e halo ona submisaun ba projetu 19, husi númeru ne’e hitu mak tama ona konkursu públiku estrada rurál husi suku bá postu administrativu sira.

Bazea ba rezultadu levantamentu, estrada iha Covalima husi postu administrativu Fohorem no Fatumea mak grave no ba postu Fatululik no sira seluk sei di’ak uitoan.

Sidónio Gusmão salienta katak, iha posibilidade estrada rurál iha suku balun bele halo ona reabilitasaun, maibé husi suku 30 ida ne’ebé mak tama ona lista seidauk bele hatene loloos. Nune’e, Obra Públika Covalima nafatin halo koordenasaun ho administradór postu sira nune’e halo karta akompañamentu kona-ba kondisaun estrada ne’ebé populasaun halo ezijénsia maka’as.

Dadaun ne’e, administradór postu Tilomar mak submete ona pedidu ba Obra Públika Covalima atu informa ba nasionál, enkuantu postu sira seluk seidauk submete pedidu sobre kondisaun estrada rurál.

Orsamentu ne’ebé Autoridade Covalima hetan husi Governu sentrál hamutuk millaun $7,3 ne’ebé aloka ba saláriu no vensimentu  millaun $2,3, bens no servisu $846.885, tranferénsia públika millaun $ 2,6, kapitál menór $166.820, kapitál dezenvolvimentu millaun $1,4, ne’ebé verba aloka ba Servisu Munisipál Obra Públika Covalima hamutuk $154.449.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!