BAUCAU, 18 marsu 2024 (TATOLI) – Ministériu Agrikultura, Pekuária, Peska no Floresta (MAPPF) segunda ne’e, entrega tratór hamutuk tolu ba Servisu Munisipál Agrikultura liuhosi Autoridade Administrasaun Munisipál Baucau.
Ministru Agrikultura, Pekuária, Peska no Floresta (MAPPF), Marcos da Cruz, esplika, governu kontinua fó prioridade ba setór agrikultura hanesan halo planu programa no atividade liuhosi orsamentu jerál estadu hodi fasilita ekipamentu ba agrikultór sira iha baze hanesan sosa tratór hodi distribui ba munisípiu sira-ne’ebé konsideradu sai produtór ba agrikultura.
“Estadu nia hakarak iha parte agrikultura mak fornese ai-haan ne’ebé barak, saudável no sustentável nune’e ita halo servisu barak oinsá mak bele hakbiit no fasilita agrikultór sira atubele halo servisu ho di’ak,” Ministru Agrikultura hateten iha Vila Nova, segunda ne’e.
IX governu konstitusionál komprometidu sei kontinua programa sira-ne’ebé hala’o ona hosi governu anteriór no kontinua avansa ba oin hodi atinji mehi estadu nia iha setór agrikultura katak prepara hahaan ba povu ho kuantidade no kualidade, nutritivu, sustentável inklui asesivel.
Tratór hirak-ne’e governu sosa hamutuk 25 hosi orsamentu reatifikativu tinan-2023 ho totál orsamentu hamutuk rihun $848 ne’ebé antes ne’e distribui ona ba munisípiu Ainaro, Manatuto, Viqueque, Bobonaro, Rejiaun Admistrativa Espesiál Oecuse Ambeno (RAEOA) inklui ohin iha Baucau.
“Ami fó tolu tanba munisípiu Baucau iha potensiál ba agrikultura inklui antes ne’e iha ona tratór,” Marcos da Cruz akresenta.
Prezidente Autoridade Munisipál (PAM) Baucau, Veneranda Eurico Marques Lemos Martins, agradese ba MAPPF tanba oferese ona tratór ba autoridade administrasaun tanba konsidera fó importánsia ba agrikultór sira iha munisípiu Baucau.
“Ita espera katak prezente hosi nasionál fó ba ita, ita bele organiza no uza ho didi’ak nune’e agrikultór ne’ebé presiza fila rai bele halo proposta atu autoridade halo mekanisme hodi hotu-hotu bele hetan atu fila-rai,” Veneranda Lemos argumenta.
Munisípiu Baucau antes ne’e iha tratór hamutuk 28, kompostu hosi ualu mak estragus no 20 mak sei halo operasaun no kontinua halo manutensaun bainhira avaria liuhosi mekániku movel ne’ebé direitamente hosi nasionál.
Jornalista : Natalino Belo
Editór : Evaristo Soares Martins
