iklan

MUNISÍPIU, SEGURANSA, VIQUEQUE

PNTL Viqueque aprezenta suspeitu ualu ba MP deskofia envolve konfrontu iha ESJ Uatucarbau

PNTL Viqueque aprezenta suspeitu ualu ba MP deskofia envolve konfrontu iha ESJ Uatucarbau

Konfrontu entre estudante ESJ Uatucarbau iha munisípiu Viqueque. Imajé Tatoli/Vitorino Lopes da Costa

VIQUEQUE, 18 marsu 2024 (TATOLI)— Komandu Polísia Nasionál Timor-Leste munisípiu Viqueque halo ona detensaun no investigasaun ba suspeitu na’in-ualu no aprezenta ona ba Ministériu Públiku (MP), ne’ebé deskonfia envolve konfrontu iha Eskola Sekundáriu Jerál (ESJ) Uatucarbau-Viqueque.

“Kazu konfrontu ka tuda malu ne’e akontese iha oron 9 to’o 11 marsu 2024, ne’ebé envolve hosi etudante sira to’o balun hetan kanek, Nune’e ita-nia PNTL eskuadra Uatucarbau ba identifika, halo detensaun no investiga hodi kontinua aprezenta suspeitu na’in-ualu ba ona Ministériu Públiku atu kontinua prosesu tuir lei ne’ebé  vigora”, Komandante PNTL Munisípiu Viqueque, Superintendente António Rego Fermandes, informa ba Agência TATOLI,I.P, segunda ne’e.

Tuir kronolojia konfrontu ne’e katak líder ESJ Uatucarbau deside transfere estudante na’in-rua tanba kontra regulamentu eskola nian liuliu halo problema hela de’it iha eskola, maibé entre estudante rua ne’e estudante ida ho inisiál L la aseita desizaun ne’ebé konsellu eskola foti hodi provoka kontrontu iha loron 9 fulan-Marsu.

“Tanba sira rona sala informasaun katak sira-nia oan balu mate iha eskola ESJ Uatucarbau. Entaun abitante no xefe aldeia husi suku Vessoru ba halo konfrontu hasoru estudante sira tama to’o eskola hodi hakanek profesór ida no mós membru PNTL na’in-tolu sai vítima tanba hetan tuda”,nia relata.

Suspeitu na’in-ualu ne’ebé PNTL Viqueque aprezenta ba MP kompostu husi estudante na’in-haat no estudante nia família na’in-haat.

Konfrontu ne’ebé akontese ne’e harahun sasán patrimóniu Estadu hanesan vidru janela eskola no estudante balun kanek.

Hafoin kontrontu, PNTL munisípiu Viqueque asegura seguransa ba ESJ Uatucarbau, nune’e hodi kontinua prosesu apredijazen. Daudauk ne’e Komandu PNTL referidu monta ona postu permanente ida eskola ne’e.

Relasiona ho konfrontu ne’e, Diretór Servisu Edukasaun Munisípiu Viqueque, Domingos Brandão, reforsa autoridade suku Vessoru-Uatulari no Uatucarbau tuur hamutuk ona hodi buka solusaun ba konfrontu hodi prosesu apredijazen kontinua la’o normal.

“Ohin 18 fula-Marsu prosesu prejensiál hahú ativu ona. Autoridade postu rua ne’e mós reside ona atu rezolve tuir kultura liuhusi tara-bandu hodi hametin dame. Serémonia kulturál ne’e sei realiza iha fulan-Abríl ne’e”, Domingos informa.

Jornalista: Vitorino Lopea da Costa

Editóra      : Florencio Miranda Ximenes

iklan
iklan

Leave a Reply

iklan
error: Content is protected !!