DILI, 18 marsu 2024 (TATOLI)—Institutu Nasionál Estatítika Timor-Leste, Institutu Públiku (INETL, I.P) serbisu hamutuk ho Sekretaria Estadu Formasaun Profisionál no Empregu (SEFOPE) no Universidade Flinders hosi Austrália, halo peskiza ba traballadór timor-oan sira ne’ebé serbisu iha Austrália no Koreia Súl, ne’ebé hatudu traballadór sira defísil halo investimentu.
Peskiza ne’e halo espesífiku ba traballadór timor-oan sira ne’ebé mak serbisu iha Koreia Súl no Austrália, enkuantu Inglatera no Irlándia seidauk tanba lista iha SEFOPE laiha.
“Peskiza ne’e ekipa sira halo iha tinan 2022, balun 2023, daudaun relatóriu prelimináriu iha ona no hatudu katak traballadór ne’e bainhira serbisu hotu ona no filafali mai Timor, sira defísil atu halo investimentu filafali. Rezultadu prelimináriu iha ona no aprezenta ba ona Parlamentu Nasionál, tuir planu iha fulan-jullu tinan ne’e sei halo aprezentasaun finál ba Governu,” Prezidente INETL, I.P, Elias dos Santos Ferreira, hateten ba Agência Tatoli, iha salaun Diresaun Jerál Jestaun Patrimóniu Estadu, Balide , segunda ne’e.
Notísia relevante : SEFOPE sei halo levantamentu dadus ba eis-traballadór Austrália no Koreia Súl
Objetivu peskiza atu hatene remesa hosi traballadór timor-oan ne’ebé serbisu iha Austrália no Koreia, osan ne’ebé sira simu haruka mai Timor halo saida de’it, ajuda ekonomia família hanesan fó eskola ba membru família ka hadi’a uma. Aleinde ne’e peskizadór sira sei halo entrevista ho uma-kain sira ne’ebé ninia oan laiha ida mak bá serbisu iha rai-li’ur, nune’e bele halo komparasaun ho sira ne’ebé serbisu iha rai-li’ur no sira ne’ebé la bá.
“Relatóriu hosi Banku Sentrál Timor-Leste (BCTL, sigla portugés) hatudu katak remesa ne’ebé traballadór hosi Koreia no Austrália inklui Inglatera hatama mai Timór hamutuk millaun $176-resin, boot liu mak hosi timor-oan sira iha Inglatera, tuir mak Austrália. Maibé iha peskiza ne’e hatudu mai ita katak sira-nia problema maka bainhira filafali mai Timor atu halo fali saida ne’e mak problema, ne’ebé dalaruma sira uza osan ne’e to’o osan hotu de’it,” Prezidente INETL, I.P tenik.
Elias dos Santos dehan traballadór sira hetan osan barak maibé bainhira fila mai Timor-Leste hasoru difikuldade kompete iha negósiu.
“Loke kios, ita fa’an sasán folin sentavu 0,50, Xina fa’an ho folin sentavu 0,25, ne’ebé sira (traballadór) informa mai ami katak sira labele halo kompetisaun ho empreza boboot sira,” nia akresenta.
Peskizadór hamutuk na’in-20 tuir uluk formasaun durante loron-rua, iha loron 07 to’o 08 outubru molok tun ba terrenu hodi halo peskiza, ne’ebé fasilita hosi INETL, SEFOPE no Universidade Flinders.
Jornalista : Antónia Gusmão
Editora : Julia Chatarina
