iklan

NASIONÁL, EKONOMIA, HEADLINE

SEFOPE sei halo levantamentu dadus ba eis-traballadór Austrália no Koreia Súl

SEFOPE sei halo levantamentu dadus ba eis-traballadór Austrália no Koreia Súl

Traballadór timoroan sira halo juramentu molok bá serbisu iha Koreia Súl, iha salaun Timor Lodge, Comoro, kinta (12/01). Imajen Tatoli/Francisco Sony

DILI, 21 fevereiru 2023 (TATOLI) – Sekretaria Estadu Formasaun Profisionál no Empregu (SEFOPE) sei halo levantamentu dadus ba eis-traballadór sira ne’ebé ramata ona serbisu iha Austrália no Koreia súl, ne’ebé benefisia ona programa mobilidade laborál.

“Ami iha ona planu liuhosi Departamentu Merkadu Traballu atu halo peskiza ka buka tuir ita-nian traballadór sira ne’ebé ramata tiha ona serbisu iha Austrália no Koreia atu buka hatene sira hela iha ne’ebé, husi munisípiu no filafali mai halo saida?”, Diretór-Jerál SEFOPE, Paul Alves, hateten iha Timor Plaza.

Nia relembra katak SEFOPE halo ona peskiza iha 2016, maibé ba de’it graduadu hosi sentru formasaun sira, mas ba traballadór sira seidauk no foin mak atu realiza.

“Ekonomikamente benefísiu hosi sira ne’ebé bá rai-li’ur liuhosi haruka remesa ne’e boot liu tiha ona kafé. Uluk kafé mak ninia rendimentu númeru daruak no dahuluk nafatin mina no gás”, nia realsa.

Dirijente ne’e salienta espetativa haruka ema bá estranjeiru la hela permanente, maibé polítika Governu nian katak bá Koreia entre tinan tolu no lima no Austrália entre fulan-sia no tinan-tolu.

“Hotu tiha filafali mai Timór  saida mak sira lori mai, katak ba ne’e manán esperiénsia aleinde hetan mós abilidade hodi mai aplika fali iha ita-nia rain hodi loke empregu ba aan rasik no ema seluk”, dehan.

SEFOPE identifika mós katak traballadór hamutuk 1.500 mak harii sira-nian uma liuhosi programa mobilidade laborál. “Ne’e hatudu katak ekonomikamente iha mudansa duni. Ein termu orsamentu daudaun ita koopera ho rai rua (Austrália no Koreia Súl)”, afirma.

Iha tinan 2022, SEFOPE haruka traballadór hamutuk 1.160, hosi ne’e halo ona investimentu kuaze rihun $850 liuhosi programa Fundu Dezenvolvimetu Kapitál Umanu hodi disponibiliza formasaun lian Koreia. Iha tinan hanesan, sira haruka remesa millaun $1.

“Enkuantu Austrália ninia infelizmente seidauk halo investimentu no sira ne’ebé bá Austrália buka kursu inglés iha fatin balun, maibé sira-nia kontribuisaun mós maka’as tebtebes. Hosi 2012-2022 osan ne’ebé sira hatama mai millaun $60. Dadus ne’e hetan hosi sira na’in rasik mai deklara ba ami”, nia relata.

Timoroan ne’ebé serbisu iha Austrália hosi 2012 to’o 2022 hamutuk 8.655, kompostu hosi feto na’in-1.026 no mane 2.717. Traballadór ne’ebé fila mai Timór feto 1.645, mane 3.267, traballadór ne’ebé hetan asidente iha Austrália feto laiha no mane na’in-haat. Traballadór ne’ebé serbisu iha Koreia Súl hosi tinan 2009 to’o 2022 hamutuk 5.088.

Notísia relevante: Traballadór timor oan kontente hetan oportunidade ba servisu iha Korea Súl

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!