DILI, 19 marsu 2023 (TATOLI) – Asosiasaun Emprezariál Feto Timor-Leste (AEMTL, sigla portugés) lansa, ohin, website ofisiál hodi promove atividade feto emprezariál nian iha país atu kontribui ativamente ba kreximentu ekonómiku família no dezenvolvimentu ekonómiku nasaun nian.
Prezidente AEMTL, Hergui Luina Fernandes, hatete asosiasaun kria ninia sítiu web ne’e ho objetivu atu fornese informasaun kona-ba atividade AEMTL nian ba membru sira, inklui mós ba públiku atubele hatene progresu ne’ebé organizasaun halo ona iha país.
“Ita lansa ofisialmente ona website AEMTL nian. Ba maluk sira ne’ebé hakarak asesu ba atividade AEMTL nian bele tama iha https://aemtl.tl/ hodi asesu ba informasaun sira. Portál ne’e fornese lian haat hanesan tetun, portugés, indonézia no inglés”, Hegui Luina informa iha Fundasaun Oriente, iha Bairro dos Grilhos, ohin.
Nia esplika katak lansamentu website ne’e konsidera lori imajen foun ida no meiu foun atu lori inovasaun iha dijitalizasaun, solusaun no aspirasaun atu serve emprezáriu feto sira. Sítiu web ida ne’e sei permite emprezária AEMTL no feto sira atu kontribui ativamente ba kreximentu ekonómiku família no dezenvolvimentu ekonómiku iha Timor-Leste.
Tuir nia, website ne’e sei halibur objetivu estratéjiku sira AEMTL nian atu promove negósiu membru sira-nian no produtu lokál sira ba merkadu nasionál no globál sira. Site ne’e sei hametin liután AEMTL atu sai organizasaun profisionál ida ne’ebé iha kapasidade dinámika ba advokasia no merkadoria ne’ebé bele habelar liuhusi rede organizasaun sira seluk ba jerasaun rendimentu sustentavel.
“Haforsa institusionál ne’e importante tebes tanba AEMTL nu’udar organizasaun feto nian ida atu hasa’e feto emprezária sira-nian abilidade atu sai independente hodi hadi’a kreximentu ekonómiku família no nasaun nian”, nia reitera.
Reprezentante Kámara Komérsiu Indústria Timor-Leste (CCI-TL), Alberto Araújo, apresia inisiativa AEMTL nian hodi lansa nia website.
“Iha website ida ne’e atividade hotu-hotu ne’ebé AEMTL hala’o sei atualiza liuhosi plataforma dijitalizasaun. CCI-TL iha kompromisu atu serbisu hamutuk ho AEMTL hodi fornese formasaun ba emprezária sira oinsá atu halo sira independente hodi jere sira-nian negósiu atu asegura família nia ekonomia no nasaun”, nia reforsa.
Embaixadór UE, Marc Fiedrich, hatete dijitalizasaun abranje iha aspetu barak iha ema nia moris loroloron iha forma hotu. Prosesu dijitalizasaun komesa iha dékada lima no muda ona estilu moris ema nian, halo forma diferensa iha tranzasaun, interasaun no realizasaun atividade.
“Teknolojia dijitál fasilita ita-nian komunikasaun, forma oinsá ita asesu ba meiu komunikasaun sosiál, ba kuidadu saúde, ba komérsiu no ba produsaun bens sira. Impaktu teknolojia dijitál prevalese iha espetru ita-nia moris no era atuál dezigna mós hanesan era dijitál. Dijitalizasaun, bele dehan, veíkulu ba era foun transformasaun nian”, diplomata ne’e realsa.
Marc Fiedrich salienta katak Uniaun Eropeia konsidera teknolojia dijitál muda ema nia moris no estratéjia dijitál UE nian bele halo transformasaun ne’e funsiona iha prol ema nian no empreza sira, kontribui simultaneamente ba alkansa objetivu Europa ida ho impaktu neutru iha klima até 2025.
“Utilizasaun krexente meiu komunikasaun dijitál iha komunikasaun emprezariál no iha divulgasaun dadus servisu no produtu sira sei kondús lalais kreximentu komérsiu eletróniku iha mundu. Ha’u felisita Asosiasaun Emprezariál Feto Timor-Leste ba kontribuisaun atu Timor-Leste dezempeña papél ativu ida iha transformasaun ne’e”, afirma.
Lansamentu website ne’e liuhusi Parceria para o Reforço da Governação Urbana, a Inclusão Social e a Promoção do Empreendedorismo em Dili, ne’ebé envolve domíniu importante neen mak reforsu kapasidade/formasaun, intervensaun iha espasu públiku, urbanizmu, servisu públiku, partisipasaun públika no empreendedorizmu.
Parseria ne’e apoia husi UE no fasilita kolaborasaun estreita entre UCCLA- União das Cidades Capitais de Língua Portuguesa, Asembleia Munisipál Lisboa no Autoridade Munisipál Dili.
Jornalista: Tomé Amado
Editora: Maria Auxiliadora
