Estudante UNDANA-UNPAZ halo asaun sosiál hodi prevene Dengue no Chikungunya
DILI, 19 marsu 2024 (TATOLI)– Estudante hosi Universidade Nusa Cendana (UNDANA), Kupang-Indonézia no Estudante Fakuldade Saúde Públika no Siénsia Médika (FSPeCM), Universidade da Paz (UNPAZ), kolabora realiza atividade asaun komunitária hodi prevene moras Dengue no Chikungunya ne’ebé sai hanesan moras ameasa bo’ot ba saúde públika.
Realizasaun atividade ne’e hosi estudante programa Mestradu Saúde Públika na’in haat husi UNDANA Indonézia no envolve estudante Saúde Públika UNPAZ na’in-50, hetan mós apoia materiál husi Ministériu Saúde.
Atividade refere realiza iha Aldeia Penal Ai-mutin, Suku Comoro, iha loron 15 marsu 2024 foin lalaise ne’e.
Atividade ne’ebé hala’o mak hanesan halo Promosaun Edukasaun Saúde, distribuisaun panfletu, observa direta kondisaun ambiente husi komunidade inklui halo distribuisaun abate ba komunidade sira.
“Distribuisaun abate mak dalan ida atu hamate susuk tolun. Totál uma-kain ne’ebé vizita hamutuk 100. Husi atividade refere hetan apoio másimu husi autoridade lokál liuliu hanesan xefe aldeia”, refere nota ne’ebé Agência TATOLI, I.P, asesu, tersa ne’e.
Iha biban ne’e, Komunidade Aldeia Penal Ai-mutin, Imaculada Pinto, sente kontente no orgullu tebes ho asaun sosiál hosi universidade rua ne’e tanba ajuda tebes komunidade sira iha aldeia refere liu-liu hasai ona koñesimentu komunidade sira kona- bá moras rua ne’e.
Autoridade sira mós husu atu atividade hanesan ne’e iha futuru nafatin kontinua atu nune’e bele redús moras Dengue no Chikungunya iha komunidade sira nia le’et.
Notísia relevante: Estudante Universidade Nusa Cendana Kupang ho UNDIL hala’o servisu sosiál iha PLBN Wini
TATOLI
