DILI, 19 marsu 2024 (TATOLI)—Membru Parlamentu Nasionál (PN) liuhosi Deputada bankada CNRT, Maria Gorumali Barreto, husu ba Governu atu koordena ho órgaun lejislativu atu bele kria Lei Protokolu Estadu.
“Ha´u rekomenda, se bele ita iha Lei Protokolu Estadu para haree ba asuntu ne’e. Se lae, ita ukun aan tinan 20-resin ona maibé ita failla iha protokolu Estadu, ”’ nia levanta asuntu ne’e liuhosi reuniaun plenária PN, tersa ne’e.
Nia dehan, asuntu protokolu Estadu ne’e sériu no presiza haree ba protokulu Estadu, tanba Timor-Leste restaura ona nia indepedénsia tinan 20-resin ona, maibé iha Governu dahaat mai daneen ne´e protokulu Estadu la´o duni maibé ba oin to’o mai agora protokulu Estadu ne’e hanesan problema bainhira realiza eventu importante sira hosi instituisaun Estadu.
Deputada husi bankada Governu ne’e hakarak rekomenda ba ezekutivu presiza hadi´a ba oin, liuliu halo kapasitasaun ba protokulu iha ministériu sira hotu no kria Lei Protokolu Estadu ne’e rasik.
Deputada CNRT, Angela Maria Corvelo de Andrade Sarmento, sekunda kona-ba protokulu Estadu ne’e sai preokupasaun ida tenke iha duni lei protokolu Estadu, tanba dalabarak entidade boot sira ladun tuir regra protokolu.
“Protolu ne’e regra ida, ita bele dehan ne’e mai hosi ita-nia beiala sira no iha uma lulik sira mós iha protokolu, tanba ne’e mak Estadu presiza iha duni lei ida protokolu Estadu hodi regula ema hotu tuir,” nia hateten.
Vise Ministru ba asuntu Parlamentár, Adérito Hugo da Costa, hateten asuntu protokolu Estadu, no liuhosi komunikasaun hotu parte Prezidente PN ho nia gabinete hala’o hela anti-projetu ida no parte Governu aprezenta ona inisiativa ida-ne’e hodi fó kontinua tanba lei iha ona regra protokulu Estadu regula hosi lei.
Tuir Nia, Lei Protokolu Estadu antes ne’e kaduka hela iha lejislatura anteriór, nune’e ho koordenasaun Governu ho PN oinsá adianta fali proposta-lei ne’ebé kaduka hela iha PN halo ona diskusaun iha faze jeneralidade, entaun iha kestaun ne’e agora diskusaun hela ho meza PN inisiativa ne’e bele avansa fali.
Jornalista : Nelson de Sousa
Editór : Cancio Ximenes
