iklan

POLÍTIKA

PN aprova rezolusaun husu auditória indepedente ba Kámara Konta

PN aprova rezolusaun husu auditória indepedente ba Kámara Konta

Prezidente Parlamentu Nasionál, Maria Fernanda Lay. Imajen Tatoli/Francisco Sony

DILI, 19 marsu 2024 (TATOLI)—Parlamentu Nasionál (PN), tersa ne’e, liuhosi reuniaun plenária aprova projetu rezolusaun númeru 34/VI(1a) hodi rekomenda Governu atu halo auditória independente jestaun Kámara Konta.

“Rezultadu votasaun a-favór 52, kontra 0 no asbtensaun  rua (2) ho la vota ida (1), nune’e rezolusaun ne’e pasa,” Prezidente Parlamentu Nasionál, Maria Fernanda Lay,  fó sai iha sala plenária.

Tuir proposta textu rezolusaun ne’ebé iha katak, tuir forsa aplikasaun iha artigu 25 alínea “b” husi lei númeru 9/2011, 17 agostu, ne’ebé aprova orgánika Kámara Konta, fiskalizasaun jestaun Kámara Konta Tribunál Superiór Administrativu, Fiskál no Konta, hodi hala’o anuál, realiza hosi empreza espesializada ba auditória no konsta relatóriu atividade Kámara Konta, no auditória hosi empreza espesializada ne’e hili liuhosi konkursu.

Tuir konstituisaun artigu 92 no artigu 25 alínea “b” númeru 9/2011, 17 agostu, mak Deputadu ne’ebé asina sai proponente ba rezolusaun ne’e kompostu husi Deputadu Duarte Nunes, Patrocíno dos Resi Fernandes (CNRT), Aniceto Guterres (FRETILIN), Luis Roberto da Silva (KHUNTO), Maria Angelina Sarmento (PLP), Armando dos Santos (PD) hodi propoin ba Parlamentu Nasionál rekomenda ba Governu ho pontu tolu, hanesan dahuluk determina realizasaun auditória finanseira ba Tribunál Rekursu, hosi entidade independente ne’ebé designa liuhosi proposta Kámara Konta hosi periódu 2018-2023.

Daruak, auditória finanseira atu hala’o prosede análiza konta, situasaun finanseira no legalidade no regularidade ba operasaun ne’ebé realiza hosi Kámara Konta no emite korespondente paréser.

Datoluk, termu konkursu presiza mensiona devér informa periódikamente ba PN ba andamentu auditória no konkluzaun interlokutória.

Entretantu tuir lei númeru 9/2011, 17 agostu, Organica da Câmara de Contas do Tribunal Superior Administrativo, Fiscal e de Contas, iha artigu 2 (Jurisdisaun no kompeténsia), iha alínea  1 hateten Tribunál Superiór Administrativu, Fiskál  no Konta exerse,  liuhosi ninia Kamara Konta, ho kompeténsia sira kontrolu finansa públika, jurisdisaun no podér kontrolu finanseiru  iha  ámbitu ordem jurídika repúblika demokrátika Timor-Leste, tantu iha territóriu nasionál no estranjeiru, iha relasaun serbisu, organizmu ou reprezentasaun Estadu  iha  exteriór.

No alínea 2 hateten Tribunál Superiór Administrativu, Fiskál no Konta, liuhosi Kámara Konta, fiskaliza legalidade no regularidade ba reseita no despeza públika, apresia boa jestaun finanseira no efetiva responsabilidade hosi infrasaun finanseira.

Deputadu proponente, Duarte Nunes, propoin atu PN rekomenda tanba durante dezde hosi tinan 2002 to’o agora rona de’it mak Tribunál Kámara Konta halo auditória ba instituisaun públika sira, maibé tuir lei instituisaun hotu-hotu Estadu nian tenke hakruuk ba lei regula uza osan Estadu nian tanba Tribunál sira mós uza.

“Nune’e, ami hanoin la sala PN rekomenda atu iha auditória externa. Signifika ita tau ona osan iha finansa mak kaer, ita espera bainhira iha hanoin ona ou desizaun ona atu kontrata bele iha auditória ida ba Tribunál, tanba ne’e espera (Deputadu) hotu-hotu konkorda aprova hodi PN halo rekomendasaun ba buat ne’ebé ita hakarak,” nia fundamenta.

Deputadu proponente, Aniceto Longuinhos Guterres Lopes, subskreve projetu rezolusaun ne’e nu’udar Xefe Bankada FRETILIN hodi apoiu inisiativa atu garante transparánsia ho akuntabilidade iha jestaun finansa públika no mós iha Kámara Konta no Tribunál Rekursu.

Tanba lei fó dalan katak, Kámara Konta mós tenke sai sujeita mós ba auditória ba despeza ne’ebé Kámara Konta halo ne’e normál, tanba se sira Kámara Konta bele julga Estadu tomak kona-ba despeza no konta Estadu nian nune’e sira mós tenke iha akuntabilidade mós iha responsabilidade.

Maibé tanba lójika sira labele julga sira-nia aan rasik, tanba ne’e lei prevee instituisaun Estadu hotu hakruuk ba lei no tenke obedese ba regra uzu osan Estadu.

“Kámara Konta mós seidauk iha auditória ida hanesan ne’e klaru externa,” nia hateten.

Jornalista : Nelson de Sousa

Editór        : Cancio Ximenes   

iklan
iklan

Leave a Reply

iklan
error: Content is protected !!