COVALIMA, 19 marsu 2024 (TATOLI) – Komandu Polísia Nasionál Timor-Leste (PNTL), munisipiu Covalima hamutuk ho autoridade munisipál diskute estabelesimentu Konsellu Seguransa Munisipál (KSM) hodi prevene konflitu sosiál iha munisípiu ne’e.
Komandante PNTL munisípiu Covalima, Superintendente Polísia, Calisto Gongaza, hatete enkontru ne’e atu autoridade lokál no líder komunitáriu sira tau idea hamutuk oinsá forma KSM hodi haree ba asuntu seguransa atu bele prevene konflitu sosiál.
“Hakarak dezenvolve rai ida ne’e, labele konta ema ida de’it mak bele garante seguransa, maibé tenke tuur hamutuk hodi haree asuntu seguransa sai fatór prinsipál ba iha setór seluk bainhira laiha trankilidade”, Calisto Gongaza hatete iha bairru Costa, ohin.
Kriasaun KSM ne’e relasiona ho Polítika Governu atu dezenvolve projetu Suai Supplay Base, aeroportu, portu no autoestrada iha Covalima, nune’e ba kestaun seguransa tenke envolve ema hotu hodi bele garante estabilidade.
Knaar no responsabilidade KSM mak lidera enkontru KSM, halo koordenasaun ho parseiru servisu programa polisiamentu komunitáriu (KPK) hodi organiza enkontru regulár KSM kada fulan tolu no halo fiskalizasaun ba serbisu KPK.
Aleinde ne’e , prepara pontu ideia foti asaun ba asuntu problema komunidade ne’ebé hato’o liuhusi KPK hodi halo atendimentu no responde ba preokupasaun sira, presiza analiza kle’an kona-ba pedidu husi KPK hodi define loloos abut husi problema atu bele solusiona no atualiza ka relata progresu serbisu iha enkontru konsellu diretivu nasionál kada fulan neen.
Membru KSM kompostu husi prezidente mak komandante PNTL munisípiu Covalima, Presidente Autoridade Munisipál ne’ebé parseria ho veteranu sira, diretór servisu munisipál no diretór delegasaun territoriál no administradór postu no xefe suku sira, nune’e bele halo prevensaun konflitu iha futuru.
Iha atividade ne’e mós aborda matéria kona-ba responsabilidade, funsaun no regra membru KSM hamutuk 50, nune’e ema hotu bele hatene nia misaun.
Reprezentante PAM Covalima, Clementino Bere, aseita programa Komandu PNTL Covalima hodi kria Konsellu Seguransa Munisipál atu halo prevensaun ba konflitu. “Ohin, ita halo diskusaun nune’e bainhira krime ruma akontese ita koko buka solusaun hamutuk”, nia reforsa.
Reprezentante Prezidente Konsellu Munisipál Kombatente Libertasaun Nasionál, Joaquim da Costa, apresia mós inisiativa husi Komandante PNTL Covalima hodi kria Konsellu Seguransa Munisipál.
“Ita presiza tau-matan duni ba ita-nian rai. Presiza ema hotu nia envolvimentu tau-matan ba asuntu seguransa, nune’e ita bele garante estabilidade tanba ita-nian povu hein hela estabilidade”, afirma.
Jornalista: Celestina Teles
Editora: Maria Auxiliadora
