DILI, 19 marsu 2024 (TATOLI)—Reprezentante povu iha Parlamentu Nasionál (PN) liuhosi Deputada bankada FRETILIN, Veronica Fernandes, husu ba Governu liuhosi ministériu relevante atu tau atensaun ba populasaun iha aldeia Sana, postu administrativu Uatulari, munisípiu Viqueque, ne’ebé to’o ohin loron seidauk asesu ba liña eletrisidade.
“Hakarak levanta preokupasaun durante tinan 20-resin ita restaura ita-nia independénsia, maibé populasaun iha aldeia Sana, suku Waitame, postu Watulari, munisípiu Viqueque, inklui aldeia hitu ne’ebé lokaliza iha postu Uatulari, to’o agora seidauk hetan eletrisidade, liña eletrisidade. liña eletrisidade,” Deputada ne’e levanta liuhusi reuniaun plenária PN, tersa ne’e.
Iha tinan 2021, parte autoridade lokál hato’o ona pedidu mai iha Eletrisidade de Timor-Leste, Empreza Públika nasionál iha Dili, nune’e responde hodi orienta ona tékniku EDTL ba halo verifikasaun iha terrenu hodi identifika maibé to´o agora paradu.
Tanba enérjia eletrisidade ne’ebé asesu ona iha aldeia sira-ne’ebé mak besik atu asesu ba aldeia sira-ne’ebé mak seidak asesu, tanba besik iha de’it kilometru rua, nune’e atu implementa programa eletrifikasaun komunitária maibé to’o ohin loron seidauk iha.
Nune’e, membru órgaun lejislativa ne’e husu IX Governu liuhosi ministériu relevante atu tau atensaun, tanba komunidade-iha ne’eba nafatin hein ho esperansa Governu sei responde duni sira-nia situasaun.
“Sira preokupa, tanba aldeia sira-ne’ebé temi iha mós eskola pre-eskolár ho primária no sentru saúde, sira hakarak asesu ona eletrisidade, nune’e sira-nia oan bele estuda ho di’ak iha tempu kalan no bele fasilita funsionamentu serbisu sentru saúde ne’ebé eziste,” nia hateten.
Deputada KHUNTO, Olinda Guterres, mós husu ba Governu atu tau atensaun ba aldeia sira ne’ebé seidauk asesu liña eletrisidade iha postu Uatulari, tanba Timor-Leste restaura ona nia indepedénsia tinan 20-resin ona maibé sira nafatin sente iha nakukun laran, tanba seidauk asesu nafatin eletrisidade iha tempu ukun-aan ida-ne’e.
Vise Ministru ba asuntu Parlamentár, Adérito Hugo da Costa, hateten kona-ba eletrifikasaun komunitária ba suku ne’e nafatin kontinua politika ne’e, hanesan ba liña eletrisidade ne’ebé ho kilómetru tolu mai kraik
Tan ne’e, EDTL, E.P kontinua hela polítika ida-ne’e iha suku balun tanba distánsia la tolu kilómetru tolu sira koordena ho autoridade suku sira hodi implementa projetu eletrifikasaun komunitária nafatin iha terenu.
“IX Governu komprometivu aloka ona orsamentu tinan ne’e, para rezolve restante restu komunidade ne’ebé seidauk asesu ba eletrisidade atu rezolve, tan ne’e EDTL, E.P hala’o implementa hela polítika ne’e ho orsamentu ne’ebé aloka,”nia hateten.
Jornalista : Nelson de Sousa
Editór : Cancio Ximenes
