DILI, 20 marsu 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova rezolusaun Governu ne’ebé aprezenta hosi Ministru Planeamentu no Investimentu Estratéjiku, Gastão Francisco de Sousa, kona-ba apoiu hodi rekolla lixu iha Dili.
“Governu rekoñese nesesidade urjente atu kombate lixu, inklui lixu tasi liuhosi asaun oin-oin hanesan sensibilizasaun, limpeza iha tasi no tasi ninin, no inisiativa seluk hodi halo monitorizasaun, kontrolu, redusaun no mitigasaun lixu,” Vise-Ministru Asuntu Parlamentár, Adérito Hugo da Costa, relata hafoin reuniaun ezekutivu, iha Palásiu Governu.
Notísia relevante : Governu Aprova Rezolusaun Limpeza Jerál
Nune’e mós, determina hodi halo prosedimentu nesesáriu ba aprovasaun no finansiamentu operasaun sira ne’e to’o montante másimu millaun $1,88.
Objetivu hosi projetu rezolusaun ne’e maka atu promove koordenasaun entre ministériu oin-oin no entidade públika sira hodi alkansa objetivu ba rezolusaun ida-ne’e, liu-liu ba sira ne’ebé responsavel ba meiu ambiente no administrasaun estatál.
Antes ne’e, iha tinan 2019, Governu anteriór aprova rezolusaun ida ba promosaun asaun limpeza jerál, ne’ebé hahú implementa iha loron 22 fevereiru 2019.
Limpeza jerál ne’e realiza kada últimu sesta iha fulan ida nia laran. Ministériu hotu sei tun halo limpeza jerál hosi tuku 14:00 to’o 17:00, ne’ebé Governu sei apela atu sosiedade sivíl sira, eskola no komunidade hotu atubele kontribui iha inisiativa ne’e.
Aleinde ne’e, Governu hamosu medida adekuadu kona-ba depozisaun reziduu sólidu iha Dili hamutuk 237 pontu kolesaun lixu, edifikasaun temporáriu hodi fasilita komunidade soe fo’er no iha kontentór hamutuk 212 koloka hodi fasilita komunidade soe lixu.
Sidadaun iha sidade Dili hamutuk 300.000 resin, kada loron prodús lixu tonelada 220, ne’ebé tama ba lixeiru Tibar 55%, enkuantu tama iha esgotu no tama taxi laran 45%.
Kada populasaun prodús 0,80%-0.85% lixu kada loron, nune’e hosi populasaun millaun 1,3 resin iha territóriu tomak prodús lixu tonelada 930 kada loron.
Jornalista : Antónia Gusmão
Editora : Julia Chatarina
