iklan

EDUKASAUN, HEADLINE

Jornalista tenke tau importánsia ba asuntu prinsipál tolu

Jornalista tenke tau importánsia ba asuntu prinsipál tolu

Jornalista no editór sira iha redasaun Agência Tatoli,I.P partisipa formasaun iha Pusat Budaya Indonesia (PBI) Dili, kuarta (20/03). Imajen Tatoli/Francisco Sony

DILI, 20 marsu 2024 (TATOLI) – Prezidente Konsellu Diretivu Agência Noticiosa de Timor-Leste-Tatoli, I.P, Manuel Pinto, enkoraza jornalista sira atu kontinua tau importánsia ba serbisu jornalizmu hodi rekolla notísia ne’ebé atuál, utiliza internét hodi buka referénsia no rekolla dadus sira, no tenke sai jornalista multifunsaun.

Prezidente konsellu diretivu dezafia jornalista sira tanba konsidera asuntu sira ne’e pertinente hodi presta atensaun, tanba mídia online hanesan Tatoli ninia karákter ne’e interativu ne’ebé fó liberdade totál ba públiku atubele kontrola nia públikasaun sira.

Prezidente Agência TATOLI, I.P, Manuel Pinto. Imajen Tatoli/Francisco Sony

“Notísia ne’ebé ita fó sai lahanesan ho notísia ne’ebé publika iha jornál, televizaun no rádiu, ne’ebé bainhira ema lee no hetan erru ruma husik de’it, maibé ba mídia online hanesan Tatoli kualkér nia notísia ida maka públika ona publiku sempre akompaña husi ninia testu, foto no vídeo sira ne’ébé sei hetan intervensaun husi públiku”, dirijente ne’e hatete iha ámbitu formasaun ne’ebé organiza husi redasaun Tatoli, iha Sentru Kulturál Indonézia, iha Marcarenhas, ohin.

Prezidente ne’e salienta katak kualidade kontrolu indireta husi públiku ba divulgasaun notísia Tatoli nian ne’e mosu kedan iha tempu hanesan notísia ne’e públika. Tanba ne’e, sai dezafiu ida ne’ebé ejize kualkér produtu ne’ebé maka jornalista sira podús iha prinsípiu Tatoli nian tenke rigór.

Nia salienta mós katak la’ós jornalista hakerek depois editór haree lahalo korresaun depois públika tiha maka públiku kestiona. Tanba kestaun sira hanesan ne’e mak sei fó impaktu ba integridade no kredibilidade mídia ida nian, liuliu mídia online ida hanesan Tatoli.

Manuel Pinto mós solisita ba jornalista no editór sira atu halo reflesaun ba serbisu kada loron nian. “Karik buat sira hanesan ne’e maka akontese duni tenke buka hadi’a. Tanba kualidade husi obra ida sei la mai mesak, maibé sei mai ho ninia métodu rasik”, realsa.

Jornalista no editór sira iha redasaun Agência Tatoli,I.P partisipa formasaun iha Pusat Budaya Indonesia (PBI) Dili, kuarta (20/03). Imajen Tatoli/Francisco Sony

Iha kestaun seluk ne’ebé mak responsavel Tatoli ne’e tau atensaun mak jornalizmu sidadaun  (citizen journalism) ne’ebé sai dezafiu ba jornalista sira. Tuir Manuel Pinto, asuntu ida ne’e koloka ba espasu internét ne’ebé ohin loron jornalista sira uza hodi halo serbisu jornalizmu nian.

“Ohin loron, iha mídia sosiál iha informasaun barak mak ema públika iha ne’ebá. Dalabarak velosidade produtu ema ida nian ne’ebé públika iha mídia sosiál ne’e barak liu fali produtu jornalista sira-nian. Ne’e realidade ne’ebé akontese iha mundu ohin loron”, dehan.

Tanba ne’e, ho ezisténsia jornalizmu sidadaun ne’ebé mosu iha serbisu jornalizmu nian presiza informasaun ida atuál. Buat importante ida ne’ebé presiza tau iha konsiderasaun maka hanesan jornalista profisionál tenke halo reflesaun no hala’o serbisu jornalizmu ne’ebé iha kompetitivida ho jornalizmu sidadaun.

“Hanesan jornalista profisionál tenke iha dezafiu hodi bele define ita-nian diferensa entre jornalista profisionál ninia produtividade ho citizen journalism ne’e rasik. Produtu jornalista ida atu iha kualidade tenke hakerek ho referénsia no ho dadús. Sé la’e ema bele kestiona profisionalidade jornalista ne’e rasik. Ohin loron, papél jornalista nian ne’ebé boot ida maka aumenta ema nia koñesimentu. Hanesan jornalista iha ajénsia Tatoli tenke iha kredibilidade “, realsa.

Xefe Departamentu Komunikasaun Sosiál UNTL, Roberto Pacheco. Imajen Tatoli/Francisco Sony

Xefe Departamentu Komunikasaun Sosiál, husi Universidade Nasionál Timor Lorosa’e, Roberto Pacheco, hanesaun mós oradór ba formasaun loron dahuluk nian ne’ebé ko’alia kona-ba pensamentu krítiku husu jornalista sira tenke iha sensu krítiku. Tanba pensamentu krítiku ne’e importante tebes ba autór mídia sira bainhira hala’o nia serbisu jornalizmu.

“Notísia ne’ebé kada mídia ida hatún tenke hetan konsiderasaun bele sai informasaun ida ho loloos iha públiku. Dalabarak ami hakarak haree fali Tatoli nian publikasaun ne’e atu dehan saida, tanba ho Tatoli ninia públikasaun ne’e bele lori leitór sira adere ba”, afirma.

Tuir nia, kestaun ida pensamentu kritiku ne’e importante tebes ba autór mídia sira, liuliu ba Tatoli nu’udar ajénsia notisioza bainhira divulga informasaun ida bele konsumu husi nivel baixu ba to’o iha leten liu, signifika povu no lideransa sira bele entende ka simu katak notísia ne’e loos.

“Dalabarak iha públikasaun sira sempre hatudu dezentendimentu iha públiku. Povu ki’ik sira konsidera notísia ne’e di’ak no loos, maibé ba fali nivel leten sira la simu públikasaun ne’e. Ne’e duni, hanesan jornalista profisionál ida iha Tatoli importante liu maka tenke iha pensamentu kritiku, nune’e bele garante katak informasaun ne’ebé públika iha nia verasidade”, Roberto Pacheco sujere.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!