iklan

MUNISÍPIU, SAÚDE

Servisu saúde Ainaro rejista moras IRA aguda hamutuk 2.465

Servisu saúde Ainaro rejista moras IRA aguda hamutuk 2.465

Ilustrasaun Infesaun Respiratóriu Aguda. Imajen/Espesiál

DILI, 20 marsu 2024 (TATOLI)–Diretór Servisu Saúde munisipiu Ainaro, Bendito de Araújo, hateten srvisu saúde Ainaro rejista moras Infesaun Vias Respiratóriu Aguda (ITA) iha Ainari hamutuk 2.465.

“Iha janeiru ami rejista moras IRA ne´e hamutuk 1.187. Iha fulan-fevereiru nian ne´e, ami rejista hamutuk 1948 no iha marsu nia hahú ne’e ami rejista moras IRA hamutuk 520,” Diretór Bendito de Araújo hateten ba Agebcia Tatoli liuhosi telefonika, kuarta ne´e.

Pasiente IRA aguda ne´e aumenta barak tanba agora ne´e iha hela klima tempu udan, anin no tanba malirin no hela iha rai malirin.

Atu prevene moars IRA aguda ne´e, nia dehan, ekipa servisu saude Ainaro halo promosaun noa edukasionál liuhosi atividade sensibilizasaun ba populasaun sira kona-ba saúde públika.

“Halao aktividade promosaun antes de halo konsulta ba pasiente sira. Fahe nafatin informasaun ba moras sira-ne´e iha aktividade saude nian,” nia hateten.

Nune´e mós, iha parte seluk, ekipa servisu saúde munisípiu Ainaro halo ona advokasia ho joventude no halo aktividade sensibilizasaun ba estudante sira iha eskola, kona-ba oinsá hanorin estudante sira kona-ba fase liman, tesi liman kukun antes hemu aimoruk, han no depois ba soe bee-boot no soe bee-kiik.

Aleinde ne´e, servisu saúde Aianro mós rejista moras sira seluk hanesan diarea hamutuk 680, pneumonia hamutuk 214 no moras sira seluk tan.

Moras Infesaun Vias Respiratória Aguda (IRA)

Moras infesaun Vias Respiratóriu Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratóriu Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratóriu Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratóriu aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratóriu fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Jesuína Xavier

Editór        : Cancio Xavier

iklan
iklan

Leave a Reply

iklan
error: Content is protected !!