DILI, 20 marsu 2024 (TATOLI)– Prezidente Repúblika, José Ramos Horta, vizita hodi fahe nesesidade báziku ba komunidade sira iha suku Kribas no Soibada, postu administrativu Manatuto Vila no Laklubar.
“Prezidente fahe nesesidade báziku sira hanesan foos, mina ba te’in, manta, sabaun, no seluk tan diretamente ba ema ho defisiénsia no veteranu sira iha fatin Manatuto, Soibada no Laklubar,” refere nota ne’ebé Agência TATOLI asesu hosi media Palásiu Prezidensiál, kuarta ne’e.
Alende ne’e, Prezidente Repúblika fó mós apoiu ba atividade komunitária sira liuliu atividade desportiva mo muzika hanesan bola no piano ba koru iha Igreja Kribas.
Durante vizita, Xefe Estadu mós aproveita oportunidade atu rona preokupasaun sira ne’ebé komunidade sira hasoru, hanesan falta merenda eskolár, atendementu saúde ne’ebé la sufisiente, no kondisaun estrada ne’ebé aat.
Hataan ba preokupasaun hirak ne’e, PR Horta dehan sei hato’o ba Primeiru-Ministru, Kay Rala Xanana Gusmão, nune’e bolu atensaun ba membru Governu sira bele tau atensaun.
Entertantu, Prezidente hato’o nia preokupasaun balun hanesan Governu bele hadi’a estrada Rulalan-Laklubar, eskola balun ne’ebé fulan hirak ne’e la hetan merenda eskolár, exeptu ba sira ne’ebé hetan fornese merenda husi Care International, no kondisaun ne’ebé aat tebes iha eskola barak iha Timor-Leste laran tomak.
Ramos Horta subliña katak maske Governu iha prioridade barak iha tinan 2023 atu hadi’a sistema sira, setór sira hanesan edukasaun, saúde no agrikultura tenke sai prioridade aas liu ho orsamentu 2024 ne’ebé aprova ona iha dezembru 2023.
Prezidente nia vizita sira fó liña direta ida ba envolvimentu entre komunidade sira no xefe Estadu kona-ba nesesidade dezenvolvimentu lokál iha nasaun laran tomak.
Notísia relevante:PR Horta apoia nesesidade bázika ba vítima inséndiu iha Becora
Jornalista: Hortencio Sanchez
Editór : Florencio Miranda Ximenes
