iklan

HEADLINE, SOSIEDADE SIVĺL

CVTL atribui sertifikadu ba jornalista 19 ne’ebé konklui formasaun ba primeiru sokoru

CVTL atribui sertifikadu ba jornalista 19 ne’ebé konklui formasaun ba primeiru sokoru

Cruz Vermelha de Timor-Leste (CVTL) ensera formasaun Primeiru sokorru ba jornalista sira oisa importánsia ba salva vida iha situasaun emerjénsia. treinamentu nee halao iha CVTL durante loron tolu, tersa 19 marsu 2024.Foto Tatoli/Antonio Daciparu

DILI, 21 marsu 2024 (TATOLI) – Cruz Vermelha Timor Leste(CVTL) atribui sertifikadu ba jornalista hamutuk 19 ne’ebé ramata ona formasaun Primeiru Sokoru durante loron tolu iha CVTL.

”Ami hakarak agradese ba kolega jornalista sira ne’ebé mak durante loron tolu mai tuir ona fomasaun kona-ba primeiru sokoru. Ho ami-nia esperansa katak oinsá maluk jornalista sira bele utiliza matenek sira ne’ebé mak hetan husi CVTL atu ba implementa iha terenu liuliu ba ita-boot sira-nia instituisaun no hetan dezastre ruma bele halo primeiru sokoru ba”, Sekretáriu Jerál CVTL Luis Pedro Pinto, dehan bainhira finaliza serimónia formasaun iha CVTL, Formoza, ohin.

Nia dehan, jornalista sira mós enfrenta risku boot iha atividade kobertura ruma iha terenu, liuliu iha situasaun emerjénsia, entaun ho koñesimentu ne’ebé mak iha sai hanesan bukae ba ita-boot sira atu bele kontinua no implementa iha família, vizinñu no fatin sira hotu ne’ebé mak iha.

“Ha’u hanoin katak ohin ne’e enseramentu ba atividade ne’e ho antuazismu tebes ba ita boot sira, maske loron tolu de’it maibé saida mak aprende ona bele ba implementa iha terenu”, nia esplika.

Rekomendasaun ne’ebé CVTL fó mak ba oin sei nafatin koopera ho midia sira atu fó nafatin oportunidade ba jornalista sira seluk atu aprende kona-ba primeiru sokoru nian.

CVTL iha planu atu fó mós formasaun ba jornalista sira iha munisípiu kona-ba oinsá atu ba parstisipa iha formasaun primeira sokoru nian bainhira hetan ema dezastre ruma.

Iha fatin hanesan, treinadora Joanina Jacob Mau, hateten durante loron tolu jornalista sira tuir formasaun ne’e di’ak tebes no sira tuir duni tékniku kona-ba prátika sira ne’ebé mak formadór sira fó.

“Ita-boot sira tuir duni tékniku kona-ba prátika sira ne’ebé mak ami fó, maibé realidade kolega jornalista sira hatudu duni simulasaun sira, oinsá kesi kanek, ema nia ain ka lima tohar, entaun husi ami-nia parte haree duni katak sira-nia prátika di’ak, ba primeiru sokoru báziku sira, entaun ba oin karik vítima sira ne’ebé iha sira bele implementa”, Joanina  Jacob Mau haktuir.

Nune’e formandu husi GMN TV, Moisés Santos Almeida, dehan  formasaun primeiro Sokoru ne’ebé fasilita husi CVTL ne’e di’ak tebes ba jornalista sira atu aprende.

“Ami jornalista sira fó atensaun di’ak ho konsentrasaun másima hodi simu matéria ne’ebé fó husi treinadór sira CVTL nian, hodi nune’e sai hanesan bukae ida atu jornalista sira bele iha  koñesimentu natoon kona-ba primeiru sokoru, nune’e bele ajuda família, sosiedade, ka hala’o kna’ar ih terenu hodi antisipa karik iha kobertura sira liga ho dezastre, ami bele implementa iha ne’eba”, Moisés Santos Almeida hateten.

Entertantu, jornalista sira ne’ebé mak tuir formasaun ne’e mai husi mídia oioin hanesan Agensia TATOLI, RTTL.EP, Radio Metro TV, GMN TV, Neon Metin no seluk tan.

Jornalsita : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!