iklan

EDUKASAUN

Diretór EBC Manleu husu Governu presiza aumenta karteira eskolár

Diretór EBC Manleu husu Governu presiza aumenta karteira eskolár

Ilustrasaun karteira eskolár. Imajen/Espesiál

DILI, 21 marsu 2024 (TATOLI)– Diretór Eskola Ensinu Báziku Sentrál (EBC, sigla portugés)  Manleuana, Feliciano Domingos Tilman, hateten EBC 123 Manleu husu Governu presiza aumenta karteira eskolár tanba volume estudante tinan ne’e aumenta.

“Kona-ba fasilidade eskolár, tinan-tinan karteira eskolár laiha no ho volume ne’ebé barak mak sasán sira-ne’e estraga mós. Tanba ne’e, presiza Governu nia planu polítika ida, nune’e oinsá mak alarga ka aumenta nune’e bele responde ba númeru estudante ne’ebé boot,” nia dehan ba jornalista sira, bainhira partisipa Ministra Edukasaun (ME), Dulce Soares, fahe sertifikadu ba estudante ne’ebé tuir formasaun kona-ba klubu tein ai-han nutrisaun, iha EBC Manleu, kinta ne’e.

Diretór EBC Manleu, Feliciano Domingos Tilman, agradese ba Programa Ai-han Mundiál (WFP-sigla inglés) ne’ebé organiza no fó formasaun ba estudante sira durante iha fulan ida-nia laran.

“Sertifikadu ida-ne’e sai hanesan bukae ida atu motiva sira, oinsá mak sira bele komprende lala’ok ai-han nutritivu ba estudante. Tanba ne’e, importante liu ba ami-nia oan ka estudante sira ne’ebé tuir formasaun ida-ne’e, sira komprende ona katak liga ba ai-han nutritivu durante fulan ida,” nia dehan.

Parseiru WFP ne’e apoiu desde 2020 to’o agora no sira fó ona apoiu komputadór hitu, sound system, pasta eskola nian no selu-seluk tan ba estudante siea.

Totál estudante tinan kotuk 1.909 no tinan ne’e aumenta estudante 1.920.

Ministra Edukasaun, Dulce Soares, agradese ba WFP ho parseiru sira seluk, ne’ebé mak durante ne’e apoiu ona ministériu ida-ne´e, tanba programa ne´e sempre iha.

“Ha’u la’ós mai primeiravéz, kuandu programa ne’e hahú mós iha. Iha ne’e diretór no koordenadór eskola hamutuk ho profesór sira hamutuk ho asosiasaun dos pais professores  aproveita oportunidade ida-ne’e, atu halo tuir programa sira-ne’ebé ita-nia parseiru sira hamutuk ho ME, Ministériu Administrasaun Estatal (MAE) no Ministériu Saúde (ME) halo iha eskola ida- ne´e,” nia dehan.

Eskola seluk programa hanesan ne’e seidauk to’o, maibé koko hahú iha eskola ida-ne’e, nune’e kuandu iha eskola ida-ne’e funsiona ho di’ak, ho ema hotu nia apoiu, programa merenda eskolár bele di’ak liután.

“Mezmu ita enfrenta problema barak iha implementasaun merenda eskolár, ho apoiu doadór sira-ne’e atu apoiu nafatin programa ida-ne’e, tanba programa ida-ne’e mak sei fo saúde di’ak ba ita-nia oan sira,” nia hateten.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!