Ema na’in-sanulu konkorre vaga ba funsionáriu apoiu suku iha Fatumea
DILI, 21 Marsu 2024 (TATOLI) – Administrasaun postu administrativu Fatumea simu ona kandidatura na’in-sanulu nia dokumentu hodi konkorre ba vaga funsionáriu apoiu suku, informa administradór postu Fatumea, César Madeira.
“Ha’u simu ona kandidatura sira-nian dokumentu ne’ebé konkorre ba vaga funsionáriu apoiu suku ne’ebé fó sai iha loron 19 to’o 21 fulan-Marsu ne’e husi suku Belelulik-Leten, Fatumea no Nanu”, César Madeira hatete via telefone, ohin.
Kandidatura ne’ebé konkorre vaga ba pozisaun sira hanesan ofisiál administrasaun suku, ofisiál finansa suku, sekretáriu administrasaun suku no ofisiál ba asuntu sosiál suku nian.
Prezidente júri, João Martins, esplika katak, bazeia ba orientasaun, prosesu rekrutamentu ba funsionáriu apoiu suku ne’e, konkorrente sira submete sira-nia dokumentu iha postu administrativu sira tuir idaidak nia área jeográfika.
“Kandidatura sira konkorre ba vaga tuir númeru referénsia vaga ne’ebé iha, ne’ebé ita-nia rekursu umanu husi postu administrativu halo atendimentu hodi simu sira-nia dokumentu”, nia realsa.
Hafoin konkorrente submete dokumentu, ekipa júri husi munísipiu sei halo selesaun ba dokumentu iha kada postu administrativu idaidak, tanba ekipa júri kompostu husi prezidente, ekipa husi munisípiu, administradór postu no sekretáriu administrasaun ne’ebé sai hanesan fokál iha postu administrativu.
Relembra katak, iha 18 Marsu, Ministériu Administrasaun Estatál (MAE) hala’o ona lasamentu ofisiál ba rekrutamentu funsionáriu apoiu iha suku 452 iha Timor-Leste.
Bazeia ba Dekretu-Lei númeru 81/2023 kria servisu administrasaun-ida ba suku, hanesan servisu administrativu apoiu ba xefe suku, kompostu husi pozisaun hanesan sekretáriu administrasaun suku, ofisiál finansa suku, ofisiál administrasaun suku no ofisiál asuntu sosiál suku.
Prosesu rekrutamentu durante loron 10 ne’ebé halo selesaun sei hahú husi loron 19 fulan-Marsu to’o 1 Abríl no kandidatu ne’ebé hetan aprovasaun ikus sei dezempeña knaar importante iha ezekusaun, administrasaun ho monitorizasaun ba inisiativa-sira ne’ebé hakarak avansa progresu sosiál ho ekonómiku iha komunidade sira-nia leet.
Parlamentu Nasionál aprova ona lei ida kona-ba funsionamentu suku-sira iha fulan-Marsu tinan 2016, bazeia ba lei referidu, ba dahuluk eleisaun suku ho durasaun tinan hitu. Iha 2016, lei-ida ne’e sei nafatin hela, maibé hafoin haree ba esperiénsia tinan hitu, eis-xefe suku sira iha difikuldade. Governu da-9 kria-tan Dekretu-Lei númeru 81/2023, 11 Outubru, hodi reforsa mákina suku nian.
Vaga ba funsionáriu apoiu suku ho nia pozisaun ofisiál administrasaun, pozisaun ofisiál finansa, sekretáriu administrasaun suku no ofisiál ba suntu sosiál suku, kria ho dekretu-lei númeru 81/2023, 11 Outubru.
Jornalista: Celestina Teles
Editora: Maria Auxiliadora
