DILI, 21 marsu 2024 (TATOLI) –Konselleru Másimu Partidu Kmanek Haburas Unidade Nasionál Timoroan (KHUNTO), José Naimori Bucar, kinta ne’e hasoru malu ho Prezidente Repúbkika, José Ramos Horta, hodi konvida hodi bele halo abertura ba kongresu nasionál partidu referidu ba datoluk ne’ebé realiza iha fulan-Abríl tinan ne’e.
“Ami mai atu konvida Prezidente partisipa no halo abertura ba ami nia kongresu nasionál partidu nian ne’ebé sei hala’o iha loron 20- to’o 21, fulan-abríl,” Naimori hatete ba jornalista sira iha Palásiu Prezidensiál Dili, kinta ne’e.
Nia dehan, konvida Prezidente Repúblika atu hato’o hela mensajen ba kongresista sira hotu.
“Kongresu ne’ebé ami atu hala’o ne’e hodi prepara lideransa foun atu lidera partidu ho di’ak ba oin hodi serbí povu no nasaun ba oin,” Naimori katak.
KHUNTO apoia Governasaun Xanana
Naimori dehan partidu KHUNTO apoia másimu ba Governu dasia ne’ebé lídera husi Xanana Gusmão hanesan Primeiru-Ministru.
“Ha’u nu’udar jerasaun foun tenke estuda buat ne’ebé loos, labele sai inimigu iha polítika. Uluk Maun Taur kaer Governu ha’u sei la halo monu nia, agora maun Xanana mak ka’er fali Governu ha’u sei la hamonu nia,” nia promete.
Tanba tuir nia, povu fó ona votu maioria ba Partidu Kongresu Nasionál Rekonstrusaun Timor (CNRT-sigla portugés) hosi Partidu Demokrátiku (PD) hodi kaer ukun ne’e. KHUNTO tenke respeita no laiha rezerva.
“Agora ita hamutuk kria pás no dame ba rai ida ne’e mak importante, labele kria inimigu ba malu. Ita respeita sira ne’ebé ukun, kria unidade nasionál iha nasaun ne’e,” nia hatete.
Durante reuniaun, nia afirma Xefe Estadu mós husu hanoin balun ba Konselleiru Másimu KHUNTO kona-ba estabilidade nasaun nian.
“Ami hasoru malu ho Prezidente nia husu ami nia hanoin ruma kona-ba ita nia estabilidade nasaun nian, hanesan líder jerasaun foun ami nafatin rona no fó hanoin katak di’ak liu hametin unidade nasionál entre lider sira hotu,” nia haklaken.
Tanba nia hatutan, nasaun ne’e atu la’o di’ak ba oin presiza ema hotu nia hamutuk inklui lider nasionál sira.
Jornalista: Hortencio Sanchez
Editór: Florencio Miranda Ximenes
