DILI, 21 marsu 2024 (TATOLI) – Sekretaria Estadu Komunikasaun Sosiál (SEKOMS) aprezenta relatóriu kona-ba ezekusaun Orsamentu Jerál Estadu 2023, entre Jullu no Dezembru, ba Komisaun G Parlamentu Nasionál ne’ebé trata asuntu kona-ba Edukasaun, Juventude, Kultura no Sidadania.
Sekretáriu Estadu Komunikasaun Sosiál, Expedito Loro Dias Ximenes, informa katak iha fulan neen nia laran SEKOMS ezekuta orsamentu porsentu 94,8% ka millaun $5,5 husi totál $5,6.
“Orsamentu sira ne’e ita uza hodi hala’o programa prioridade rua maka disemina informasaun no dezenvolve setór komunikasaun sosiál iha Timor-Leste”, governante ne’e hatete iha Parlamentu, ohin.
Nia esplika katak programa ba dezenvolvimentu setór komunikasaun sosiál, liuliu rádiu komunidade ne’e tanba konsidera nu’udar liña frente Governu nian, tanba ne’e SEKOMS apoia ona orsamentu rihun $71-resin ba rádiu komunidade 21.
“Osan sira ne’e ita tranfere ba rádiu komunidade sira, depois mak sira jere rasik. Maske sira-nian ekipamentu seidauk kompletu, maibé sira kontinua hala’o serbisu jodi divulga informasaun ba komunidade”, sekretáriu Estadu relata.
Nune’e mós Prezidente Komisaun G, Armando Gomes, konsidera ezekusaun OJE 2023 ratifikativu ne’ebé SEKOMS ezekuta ona tuir duni ninia nesesidade ne’ebé iha, maibé nia husu ba instituisaun ne’e atu kontinua tau-matan ba rádiu komunidade sira hodi hadi’ak aan no reforsa liután ekipamentu sira, nune’e sira sai modernu liu.
“Mídia iha papél importante ba denzenvolvimentu país ida ne’e. Tanba ne’e, ho ezekusaun ne’ebé SEKOMS atinje ona no ho jestaun ne’ebé di’ak ne’e tenke fó nafatin atensaun ba komunikasaun sosiál sira atubele dezenvolvean ho di’ak liu”, sujere.
Notísia relevante: SEKOMS prioriza apoia Rádiu Komunidade 17 iha OJE 2024
Jornalista: Tomé Amado
Editora: Maria Auxiliadora
