DILI, 21 marsu 2024 (TATOLI)- Prezidente Repúblika, José Ramos Horta, sei fó indultu ba prizoneiru sira ne’ebé hahalok di’ak, liuliu iha leadade no kumpre ona pena iha estabelesimentu prizionál sira.
Kestaun ne’e, hato’o hosi Primeiru-Ministru, Kay Rala Xanana Gusmão, hafoin sorumutuk semanál ho Prezidente Repúblika, Jose Ramos Horta iha Palásiu Presidensiál, kinta ne’e.
Notísia relevante: Sosiedade Sivíl lamenta Xefe Estadu fó indultu ba kondenada Emília Pires no Madalena Hanjam
“Prezidente Repúblika mós ko’alia kona-ba indultu. Ami sei haree didi’ak tanba maluk barak tama ona komarka liu ona tinan 10, maibé seidauk iha julgamentu ba sira, balun hetan pena ho tinan naruk, maibé komportamentu di’ak entaun sira ne’e mak sei bele fó indultu,” hateten PM Xanana
Nune’e, Xefe Governu fó ona instrusaun ba Ministériu Justisa atu prepara lista ho propoin ba Xefe Estadu hodi bele fó indultu ba prizioneiru sira ne’ebé hatudu kumportamentu di’ak no kumpre kastigu ba kazu ne’ebé sira komete.
“Ha’u fó ona instrusaun ba Ministériu Justisa atu haree ba prezu hotu-hotu iha Timor tomak, hodi se-se hatene sira iha kadeia tanba sá, tinan hira iha kadeia no komportamentu di’ak ka lae. Buat sira ne’e hotu makai ta sei haree”, katak.
Notísia relevante: PR Horta: “Ha’u iha kompeténsia fó indultu ba Emília no Madalena”
Ho baze ba konstume iha kada selebrasaun loron nasionál sira hanesan loron nasionál ba restaurasaun independénsia (20 maiu) no loron Proklamasaun independénsia (28 novembru), Prezidente Repúblika ho nia podér konstitusionál fó indultu no komutasaun pena ba prizioneiru sira.
Tanba Tuir lei númeru 5/2016, 25 maiu, artigu 7 alínea d hateten, Ministru Justisa hato’o de’it prosesu pedidu indultu, bele mai hosi dadur, família, defeza ka kestaun ho kondisaun moras no kompeténsia atu deside mai hosi Xefe Estadu, bazea ba konstituisaun artigu 85, númeru 1 hateten Prezidente Repúblika de’it mak bele fó indultu ka hamenus kastigu, hafoin rona Governu.
Indultu no hamenus katigu haktuir iha Kódigu Penál ne’ebé aprova ho Dekretu-Lei númeru 19/2009 no Lei Númeru 15/2016 mak regula kondisaun no prosedimentu atu fó indultu ka hamenus kastigu, Prezidente Repúblika halo nia kompeténisa tuir lei haruka.
Notísia relevante: TR deklara inkonstitusionalidade ba alterasaun Lei Indultu no Komutasaun Pena, PPN: La’ós lei hotu
Jornalista: Hortencio Sanchez
Editór : Florencio Miranda Ximenes
